Apple прызнала Крым расійскім — але толькі на тэрыторыі РФ

У праграме «Карты» на прыладах кампаніі акупаваны Крым пазначаецца як расійская тэрыторыя.

Кампанія Apple прызнала акупаваныя РФ украінскія Крым і Севастопаль расійскімі.
Пра гэта заявіў старшыня камітэта Дзярждумы па бяспецы і процідзеяння карупцыі Васіль Піскароў, піша «Інтэрфакс».
«Apple унесла свае папраўкі ў геаграфічныя назвы суб'екта (РФ — заўв.рэд.) Крым і горада федэральнага значэння Севастопаль (у прадуктах кампаніі — заўв.рэд.). (Назвы — заўв.рэд.) прыведзены ў адпаведнасць з Канстытуцыяй РФ», — сказаў ён.
Па словах Піскарова, кампанія падчас сустрэчы з дэпутатам паказала візуальныя доказы ўнесеных ёю зменаў.
«Цяпер кожны карыстальнік прадукцыі Apple, уваходзячы ў праграму "Карты" і выбіраючы на ​​карце паўвостраў Крым або любы з яго гарадоў, убачыць, што гэты рэгіён пазначаны як расійскі. Мы будзем і ў далейшым кантраляваць, каб не было вяртання назад», — дадаў дэпутат .
У сваю чаргу старшыня камітэта Дзярждумы па інфармацыйнай палітыцы, інфармацыйных тэхналогіях і сувязі Леанід Левін заявіў, што «можна толькі вітаць рашэнне Apple» аб унясенні правак у свае сэрвісы.
«Гэтым крокам кампанія прадэманстравала жаданне захаваць і развіваць свае пазіцыі на расійскім рынку», — падкрэсліў ён.
Таксама Левін запэўніў, што рашэнне гэтага пытання было дасягнута «без адміністрацыйнага ціску на Apple у рэжыме адкрытага дыялогу паміж парламентам і прадстаўнікамі кампаніі».
Як паведамлялася раней, у красавіку Піскароў і Левін сустрэліся з дырэктарам ТАА «Эпл Рус» Віталём Марозька з-за абазначэння Крыма і Севастопаля ў праграме «Карты» на прыладах Apple як украінскіх тэрыторый.
У той жа час СМІ паведамляюць, што ў Еўропе, як і ва Украіне, прыналежнасць паўвострава і яго гарадоў ні да адной з краін на прыладах Apple не паказваецца.
Адзначым, раней падобная сітуацыя была з кампаніяй Google. Так, пасля сустрэчы Піскарова з дырэктарам па працы з органамі дзяржаўнай улады Google Russia Марынай Жуніч акупаваны ўкраінскі Крым стаў паказвацца як тэрыторыя Расіі. Аднак гаворка ідзе толькі пра змены для расійскіх карыстальнікаў. Ва ўкраінскай версіі паўвостраў пазначаны тэрыторыяй Украіны, а ў версіі для стацыянарных камп'ютараў наогул не паказваецца прыналежнасць да краіны.
Нагадаем, Расія акупавала Крым у лютым 2014 года. У сакавіку правяла псеўдарэферэндум, пасля якога паўвостраў далучылі да Расійскай Федэрацыі. Далучэнне Крыму да Расіі не прызнае Еўрапейскі Саюз і Злучаныя Штаты. 14 лістапада Трэці камітэт Генасамблеі ААН прыняў рэзалюцыю аб абароне правоў чалавека ў Крыме ва ўмовах расійскай акупацыі. Яе суаўтарамі сталі 39 краін. Рэзалюцыя атрымала 67 галасоў «за» і 23 «супраць». 
tsn.ua