Бел-чырвона-белы сцяг, вывешаны ў Рызе падчас хакейнага чэмпіянату свету, выставілі на аўкцыён

Падчас травеньскага чэмпіянату свету па хакеі мэрыя Рыгі памяняла дзяржаўны сцяг Беларусі на нацыянальны. Цяпер тое палотнішча выставілі на дабрачынны аўкцыён.


Як вынікае з сайта аўкцыёна, ужо зробленыя дзве стаўкі на гістарычны артэфакт, кошт лота на гэты момант — 3000 долараў. Таргі працягнуцца яшчэ 9 дзён, піша «Радыё Свабода».

Мэр Рыгі Марціньш Стакіс раней расказаў, што паслужыла падставай для замены чырвона-зялёнага сцяга на бел-чырвона-белы падчас хакейнага форуму ў Рызе.

«Па-першае, мы хацелі выказаць салідарнасць з народам Беларусі і беларускай апазіцыяй. Па-другое, немагчыма змірыцца з тым, што адбываецца ў Беларусі, як можна ўгнаць самалёт Еўрасаюза, катаваць і забіваць людзей. Усё гэта робіць рэжым, які вядзе сябе па-бандыцку. Мы не можам з гэтым пагадзіцца. Таму зрабілі такі ўчынак», — патлумачыў мэр Рыгі.

24 траўня ў цэнтры латвійскай сталіцы мэр Рыгі Мартыньш Стакіс разам з міністрам замежных спраў Латвіі Эдгарсам Рынкевічсам замянілі чырвона-зялёны сцяг Беларусі на бел-чырвона-белы з «Пагоняй» на месцы, дзе віселі на мачтах сцягі краін — удзельніц чэмпіянату свету па хакеі. Яны адзначылі, што «сцяг, які сімвалізуе рэжым, што займаецца дзяржаўным тэрарызмам, недарэчны ў гарадскім асяроддзі Рыгі».

Пасля гэтага з Беларусі выслалі амбасадара Латвіі і ўвесь дыпламатычны і адміністрацыйна-тэхнічны склад амбасады. Латвія адказала сіметрычна, выслаўшы з краіны амбасадара Беларусі і ўсіх дыпламатаў.

Генпракурор Беларусі Андрэй Швед пачаў крымінальную справу за распальванне нацыянальнай варожасці ў дачыненні да мэра Рыгі Мартыньша Стакіса і міністра замежных спраў Латвійскай Рэспублікі Эдгарcа Рынкевічcа.



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: