Літва ўнесла Беларусь і Расію ў спіс варожых дзяржаў

Урад Літвы зацвердзіў спіс варожых дзяржаў. Ён быў падрыхтаваны Міністэрствам эканомікі і інавацый.

litva_2.jpg


Літоўскія дзяржорганы змогуць не дапускаць да ўдзелу ў тэндарах кампаніі з дзяржаў, якія трапілі ў пералік, а таксама скасоўваць з імі дамовы, перадае REFORM.by.

«Да гэтага часу ў заказчыкаў не было падстаў адхіляць тэндары або скасоўваць дзяржаўныя кантракты, калі прапанаваныя тавары паступаюць з краін рызыкі або калі пастаўшчыкі звязаныя з такімі краінамі. Згодна з зацверджаным спісам дзяржаў, закупшчыкі змогуць прымаць рашэнні не фінансаваць гэтыя варожыя дзяржавы з дапамогай дзяржаўных закупак», — цытуецца ў прэс-рэлізе ўрада міністарка эканомікі і інавацый Аўшрыне Арманайтэ.

У спіс трапілі:

  • Расія,
  • Беларусь,
  • анэксаваны Крым,
  • непадкантрольнае Малдове Прыднястроўе,
  • непадкантрольныя Грузіі Абхазія і Паўднёвая Асеція.

Раней спецыяльная камісія ўрада ацэньвала тыя ці іншыя здзелкі на прадмет адпаведнасці інтарэсам нацыянальнай бяспекі і давала рэкамендацыі па скасаванні здзелак.

Трэба адзначыць, што Літва раней ужо трапіла ў пералік недружалюбных краін, зацверджаны ў Расіі. У Беларусі такога спісу пакуль няма.