Расія. Адзінаросы пікетуюць тэлеканал “Дождь”

Апытанне, зладжанае тэлеканалам "Дождь" да 70-х угодкаў зняцця блакады Ленінграда, выклікала буру абурэння. Аўтары праграмы "Дылетанты" спыталі гледачоў і інтэрнэт-карыстальнікаў: "Ці трэба было здаць Ленінград, каб зберагчы сотні тысяч жыццяў?"



Ужо праз некалькі гадзін апытанне выдалілі, галоўны рэдактар сайта "Дождь" Ілля Клішын прынёс прабачэнні. "Некарэктнае пытанне пра блакадны Ленінград было памылкай і прадзюсара праграмы, і рэдактара сацсетак", — напісаў ён у твітары.

Але скандал разгарэўся яшчэ больш. Рэгіянальныя “адзінаросы” шальмуюць здраднікаў і святататнікаў, іх моладзевае крыло пікетуе рэдакцыю. Увечары 27 студзеня "над будынкам рэдакцыі тэлеканала "Дождь" маладыя людзі, апранутыя ў форму салдатаў часоў ВАВ, паставілі сцяг — Сцяг Перамогі — аналаг таго, які быў узняты над рэйхстагам у 1945 годзе”, — рапартуюць пракрамлёўскія актывісты.  “Мы хочам нагадаць, што не дазволім нікому пераасэнсаваць і пераацэньваць вынікі Вялікай Айчыннай вайны і не дадзім ходу іншадумствам усіх тых, хто лічыць, што Вялікая Перамога магла быць дасягнутая якім-небудзь іншым коштам", — кажуць яны.

Гнеў прафесійных патрыётаў падзялілі гэтым разам і некаторыя лібералы.

Паводле grani.ru