Сянцоў напісаў завяшчанне. Ён не верыць «у шчаслівы канец гэтай гісторыі»

Наталля Каплан, сястра Алега Сянцова, на сваёй старонцы ў Facebook расказала пра ліст, які атрымала ад брата. Ён піша, што ўжо не верыць у магчымасць выйсці з турмы, але не здаецца.

Стан у яго «стабільна-хрэновы», і ён напісаў завяшчанне на сваю творчасць у выпадку смерці.
Па словах Наталлі, Алег ёй напісаў наступнае: «У тое, што я хутка выйду і мы ўсе шчасліва зажывём у Кіеве, я ўжо не веру. Як і ў шмат што іншае. Але гэта не значыць, што я расклеіўся або збіраюся здымацца (мабыць, з галадоўкі - заўв.). Я не здаўся ў любым выпадку, проста я не веру ўжо ў шчаслівы канец усёй гэтай гісторыі».
Таксама ён звярнуў увагу, што ў яго развілася гіпаксія — недахоп кіслароду ў органах, у асноўным у сэрцы і мозгу. Ён «паспрабуе трымацца, хоць жыве зараз проста па інэрцыі».
«І так, ён напісаў завяшчанне на сваю творчасць у выпадку смерці, і гэта моцна палохае», — скончыла паведамленне Наталля.

Паводле kyky.org