Чыгуначныя квіткі будуць падобнымі да чэкаў
Беларуская чыгунка з кастрычніка гэтага года змяняе знешні выгляд квіткоў на цягнікі.
Квіткі будуць
выглядаць больш проста і танна — гэта датычыцца міжрэгіянальных ліній і
рэгіянальных ліній бізнес-класа.
Зрэшты, у прэс-цэнтры Беларускай чыгункі паспрабавалі распавесці пра перавагі новых праязных дакументаў.
Журналістам растлумачылі, што БЧ пераходзіць на новую тэхналогію афармлення праязных дакументаў і будзе выкарыстоўваць іншыя машыны, якія друкуюць білеты. Пасажыраў супакойваюць, што інфармацыя на новых квітках стане больш зразумелай і нагляднай, а самі праязныя дакументы — больш трывалымі, «паколькі будуць друкавацца на тэрмапаперы, шчыльнасць якой значна вышэйшая за тую, што выкарыстоўваюць у гандлёвых сетках».
Так гэта ці не, сказаць цяжка, аднак паведамляецца, што выгляд білетных бланкаў на міжнародныя цягнікі застанецца ранейшым.
Адметна, што БЧ сцвярджае: пасажыр можа выбраць, на якой мове будзе аформлены квіток — беларускай ці рускай.
Новая форма квіткоў будзе ўводзіцца паступова. Спачатку яны з’явяцца на вакзалах станцый Брэст, Магілёў, Асіповічы і Пінск, пазней — і ў іншых пунктах продажу квіткоў БЧ.
На час пераходнага перыяду будуць існаваць паралельна дзве формы білетаў — новая і традыцыйныя бланкі.
Паводле hwww.rw.by