У Беларусі патаннеюць квіткі на некаторыя аўтобусы і цягнікі

У Беларусі адмяняюць збор за папярэдні продаж білетаў на прыгарадныя і міжгароднія аўтобусы, а таксама тарыф за афармленне квіткоў на цягнікі праз інтэрнэт.Такім чынам, для пасажыраў гэтыя квіткі стануць танней. Змены прадугледжаныя пастановай Савета міністраў № 725 ад 29 кастрычніка.

Як зменяцца цэны на квіткі на цягнікі

Цяпер пры набыцці квіткоў на цягнікі праз інтэрнэт трэба дадаткова аплачваць збор за заказ і афармленне праязнога дакумента: 24 капейкі — на цягнікі рэгіянальных ліній бізнес-класа і міжрэгіянальных ліній, 78 капеек — на цягнікі міжнародных ліній. То-бок да кошту білета дадаецца гэты збор.
Да прыкладу, квіток на цягнік міжрэгіянальных ліній бізнес-класа № 708 Мінск — Гомель цяпер каштуе 13,86 рубля. Але пры куплі ў касах вакзалаў да гэтай сумы дадаецца збор у 11 капеек, а пры анлайн-куплі — 24 капейкі. Кошт квітка — у касе 13,97 рубля, а пры куплі ў сеціве — 14,10 рубля. Пасля ўступлення ў сілу рашэння МАРГ (дакумент ужо зарэгістраваны на нацыянальным прававым інтэрнэт-партале, але яшчэ не апублікаваны) кошт анлайн-квітка складзе 13,86 рубля, а пры куплі ў касе — усё тыя ж 13,97 рубля.
У ведамстве тлумачаць, што змены ўвялі «для стымулявання электронных продажаў і скарачэння выдаткаў, звязаных з працай білетных касіраў».

Як зменяцца цэны на аўтобусы

За куплю квітка на прыгарадныя і міжнародныя аўтобусы рэгулярных зносін зараз трэба дадаткова аплачваць збор за папярэдні продаж праязнога дакумента. Камісія складае 11 капеек. Гэта значыць квіткі на аўтобусы патаннеюць на гэтую суму.

Колькі беларусы кампенсуюць за праезд, а колькі даплачвае дзяржава

У 2018 годзе беларусы кампенсавалі 43% выдаткаў на праезд у пасажырскіх цягніках. Гэта дадзеныя ў цэлым па ўнутрырэспубліканскіх і міжнародных перавозках, паведамілі ў МАРГ.
Пры гэтым у агульнай складанасці па ўнутрырэспубліканскіх перавозках насельніцтва пакрывае 18%. У тым ліку за праезд у цягніках гарадскіх ліній — 21%, а ў цягніках рэгіянальных ліній эканомкласа — 16%.
У сакавіку мінулага года ў БЧ распавядалі, што даходы ад перавозак на рэгіянальных лініях эканомкласа пакрываюць выдаткі прыкладна толькі на 15%. У МАРГ тады ўдакладнялі, што паслугі пасажырскіх перавозак унутры краіны для Беларускай чыгункі ў цэлым стратныя, а пасажыры кампенсуюць выдаткі не больш чым на 20%.
tut.by