Урад і Нацбанк зацвердзілі план па дэдаларызацыі эканомікі

Урад і Нацыянальны банк зацвердзілі комплекс сумесных мерапрыемстваў па зніжэнні ўзроўню даларызацыі эканомікі, паведаміў намеснік старшыні праўлення Нацбанка Сяргей Калечыц.

«У мэтах выканання патрабаванні кіраўніка дзяржавы Саветам міністраў і Нацыянальным банкам прыняты план мерапрыемстваў па дэдаларызацыі эканомікі», — паведаміў Калечыц на лютаўскім пашыраным пасяджэнні праўлення Нацыянальнага банка Беларусі. Поўны тэкст яго выступу публікуе выданне Нацбанка «Банкаўскі веснік».
Па словах чыноўніка, план «прадугледжвае меры па скарачэнні выкарыстання замежнай валюты ў разліках і пры выплаце збораў, пошлін і іншых плацяжоў, а таксама ў якасці эквівалента меры кошту пры фарміраванні тарыфаў, ставак і цэн».
Калечыц удакладніў, што асноўныя меры зацверджанага плана павінны быць прыняты ў 2017-2018 гадах.
«Безумоўнае іх выкананне будзе спрыяць далейшаму ўмацаванню даверу да нацыянальнай валюты. Запаволенне інфляцыйных працэсаў, больш высокая даходнасць па дэпазітах у нацыянальнай валюце ў параўнанні з інвалютнымі, стабільная сітуацыя на валютным рынку, якая сведчыць аб зніжэнні валютных рызык у краіне, фармуюць для гэтага спрыяльны фон», — заявіў Калечыц.

У сваю чаргу намеснік старшыні праўлення Нацбанка Дзмітрый Калечыц канстатаваў, што ступень даларызацыі эканомікі застаецца ўсё яшчэ высокай.
«Да канца 2016 года доля актываў дзеючых беларускіх банкаў у замежнай валюце дасягнула 61,7%. Па стане на 1 студзеня 2017 года доля валютных дэпазітаў у агульнай структуры банкаўскіх укладаў насельніцтва склала 76,3%», — адзначыў Дзмітрый Калечыц.
Пры гэтым ён удакладніў, што ў 2016 годзе намецілася тэндэнцыя зніжэння ўзроўню даларызацыі актываў і пасіваў камерцыйных банкаў.
«У рамках стварэння ўмоў па павышэнню прывабнасці зберажэнняў у нацыянальнай валюце і ўстанаўленні банкамі больш нізкай прыбытковасці па ўкладах (дэпазiтах) у замежнай валюце Нацыянальны банк рэкамендаваў банкам праводзіць паслядоўнае зніжэнне верхняга ўзроўню працэнтных ставак па ўкладах (дэпазітах) фізічных і юрыдычных асоб», — канстатаваў Дзмітрый Калечыц.
Беларускія эканамісты лічаць, што Нацбанк з дапамогай дэдаларызацыі партфеляў банкаў спрабуе павысіць свой уплыў на грашовы рынак.
«Для таго каб Нацбанк мог лепш ўплываць на інфляцыю, павінен працаваць працэнтны канал. У цяперашняй сітуацыі працэнтная палітыка Нацбанка недастаткова дзейсная, паколькі крэдытныя партфелі банкаў пераважна сфарміраваны з ільготных крэдытаў з фіксаванай працэнтнай стаўкай і з валютных крэдытаў», — адзначыў у размове з карэспандэнтам БелаПАН эканаміст Антон Балточка.
Паводле экспертных ацэнак, у агульным партфелі банкаў рублёвыя крэдыты, прадастаўленыя на рынкавых умовах, займаюць сёння каля 15%, і толькі на ўмовы выдачы такіх рэсурсаў можа ўздзейнічаць сёння Нацбанк за кошт адсоткавага канала, канстатуе Балточка.
Паводле belapan.com