Адышоў у лепшы свет пісьменнік і выдавец Віктар Хурсік
Сёння, 6 студзеня, пасля працяглай хваробы памёр Віктар Хурсік — беларускі журналіст, публіцыст, пісьменнік, выдавец, краязнаўца, грамадскі дзеяч.
Пра гэта паведамілі блізкія Віктара Хурсіка ў сацсетках: «Сёння пасля працяглай хваробы перастала біцца сэрца дарагога, блізкага нам чалавека, мужа, бацькі, дзядулі. Пайшоў з жыцця Віктар Хурсік. Хай у сэрцах тых, хто яго ведаў, назаўсёды застанецца яго светлая справа як кнігавыдаўца і грамадскага дзеяча, яго непахісны аптымізм і вера ў лепшае. Для нас ён заўсёды будзе лепшым дарадцам і любімым чалавекам».
Віктар Хурсік нарадзіўся на чыгуначнай станцыі Уборак Асіповіцкага раёна ў сям’і начальніка станцыі. У 1982 годзе скончыў Беларускі політэхнічны інстытут, працаваў канструктарам, друкаваўся ў рэспубліканскай прэсе. Быў сярод заснавальнікаў Аб'яднанай грамадзянскай партыі.
З 1991 года працаваў у газеце «Звязда». Даследаваў дарэвалюцыйную гісторыю Асіповіцкага раёна, публікаваў пра гэта матэрыялы ў цэнтральнай і мясцовай прэсе: «Род Офенбергаў у гісторыі Беларусі: Уладары фальварка Лочын маёнтка Жорнаўкі», «Зямля Радзівілаў на Асіповіччыне», «Паўстанне памяці: З гісторыі Асіповіцкага раёна ад старажытных часоў да 1911 г.».
Аўтар некалькіх кніг, сярод якіх «Vale!», «Белы лебедзь у промнях славы: Магдалена Радзівіл», «Мінскія абразкі», «Кроў і попел Дражна. Гісторыя партызанскага злачынства».
