«Белыя Халаты. Беларускія медыкі ствараюць сваё незалежнае аб'яднанне

Ініцыятыўная група руху «Белыя Халаты» разам з юрыстамі падрыхтавала дакументы для рэгістрацыі грамадскага аб’яднання супрацоўнікаў аховы здароўя, паведаміў рух у Тэлеграме.

Мэта аб’яднання — забеспячэнне законнай, бяспечнай, прафесійнай дзейнасці супрацоўнікаў сістэмы аховы здароўя.

Сярод яго задачаў:

• Абарона медработнікаў (прававая і юрыдычная), дапамога ім пры працаўладкаванні, абарона інтарэсаў медычных арганізацый любой формы ўласнасці.
• Супрацоўніцтва з міжнароднымі медычнымі арганізацыямі і асацыяцыямі па правядзенні / арганізацыі навучання / майстар-класаў / трэнінгаў медработнікаў.
• Удзел у распрацоўцы / забеспячэнне аднолькавага выканання патрабаванняў заканадаўства ў сферы аховы здароўя на ўсёй тэрыторыі Беларусі.
• Фармаванне юрыдычных службаў у ахове здароўя, якія будуць абараняць інтарэсы медыкаў пры разборы скаргаў, да суду і ў судзе.
• і інш. (цалкам можна пачытаць тут)

У хуткім часе аб’яднанне плануюць зарэгістраваць. Стаць яго заснавальнікам цяпер прапануюць любому ахвотнаму, хто мае медычную адукацыю або займаецца дзейнасцю, звязанай з аховай здароўя, жыве ў Беларусі і можа цягам трох дзён быць у Мінску для падпісання дакументаў.