Беларусам замест Егіпта прапануюць альтэрнатыўныя варыянты адпачынку

У выпадку адмовы ад загадзя купленай пуцёўкі ў Егіпет турфірмы маюць права ўтрымаць фактычна панесеныя выдаткі, заяўляе Мінспорту і турызму.



У сваю чаргу беларускія туркампаніі замест Егіпта прапануюць альтэрнатыўныя варыянты адпачынку. З вечара 6 лістапада кампаніі пачалі прыпыняць продаж тураў у Егіпет з вылетам з Масквы. Пры гэтым пуцёўкі з Мінска на егіпецкія курорты па-ранейшаму можна купіць.

У якасці альтэрнатывы сярод пляжных кірункаў найбольш папулярная Турцыя, ёсць прапановы па Тайланду і Кіпру. Колькі працэнтаў турыстаў анулявалі паездкі, прадстаўнікі туркампаній пакуль не называюць, асноўны пік зваротаў яны чакаюць пасля выхадных.

Як адзначылі ў мінскім офісе тураператара Tez Tour, пры продажы тураў кампанія ўлічвае рэкамендацыі МЗС і Мінспорту і турызму, а таксама рашэнні авіякампаніі "Белавія". Паколькі якіх-небудзь прамых забаронаў на паездкі ў Егіпет з Беларусі няма, кампанія, якая з'яўляецца адным з кансалідатарамі авіярэйсаў, працягвае адпраўку турыстаў. Пры гэтым спецыялісты нагадалі, што беларусы маюць права перанесці дату сваёй паездкі альбо змяніць краіну адпачынку.

Са свайго боку тураператар паспрабуе прапанаваць новы тур на аналагічных альбо супастаўных умовах і без дадатковай аплаты - аднак канчатковае рашэнне будзе прымацца ў кожным выпадку зыходзячы з канкрэтных умоў анулявання першапачатковага тура і ўмоў новага тура.

Калі ж турыст адмовіцца ад паездкі і захоча вярнуць аплату, то кампанія можа ўтрымаць фактычна панесеныя выдаткі, піша БелТА.

Разам з тым з'яўляецца інфармацыя, што тураператары не вяртаюць грошы ў выпадку, калі людзі адмаўляюцца ад набытай пуцёўкі ў Егіпет. Так, чытач onliner.by распавёў, што адмовіцца ад пуцёўкі ён можа толькі са 100-працэнтнай стратай грошай. Але нават калі мінчук ўсё ж такі выляціць цяпер у Егіпет, то не факт, што пасля забароны палётаў яму вернуць хоць бы частку сумы. Тураператар прапісаў у дамове, што кампенсацыя магчымая толькі ў выпадку форс-мажору.
Сітуацыю, што склалася з авіяперавозкамі ў Егіпет пасля авіякатастрофы расійскага лайнера з турыстамі, тураператар не лічыць форс-мажорам.