Беларусь – Фінляндыя – 2:3

Беларусы мелі шанец атрымаць яшчэ адну знакавую перамогу на чэмпіянаце свету па хакеі ў Чэхіі. Нашы хлопцы ў серыі булітаў саступілі Фінляндыі.



Пека Рыне, добра вядомы беларусам фінскі брамнік, які паспеў пагуляць за мінскае «Дынама», не прапускаў на гэтым чэмпіянаце чатыры гульні запар. Такую зайздросную сухую лінію фіна на 45-ай хвіліне гульні перарваў нападаючы Яўген Кавыршын. Кідок у беларуса атрымаўся ў супрацьход Рыне, у самую дзявятку – 1:0.
А амаль адразу беларусы гулялі цэлую хвіліну ў фармаце 5 на 3. За гэты час Артур Гаўрус тройчы невытлумачальна не падвоіў нашу перавагу. Рыне рабіў проста неймаверныя рэчы.
Да гэтага два перыяды выніковых дзеянняў не прыносілі. Варта адзначыць, што ў браме беларусаў з’явіўся Віталь Коваль, з прычыны траўмы Кевіна Лаланда. Многія хваляваліся за «Апельсіна», такую мянушку мае Коваль праз руды колер валасоў, бо даўно не меў гульнявой практыкі, але кіпер адыграў вельмі добрую гульню.
Праўда, у другім узяцці варот беларусаў усё ж пэўная віна Коваля адчуваецца. Наш брамнік згубіў канцэнтрацыю на імгненне, фінам гэтага хапіла. Харцікайнен дабіў шайбу пасля адскока ад барта, але тут узнікае пытанне, дзе была і абарона. У астатнім Коваль быў бездаконым.
Здавалася, Фінляндыя ўжо не ўпусціць перамогу. Беларсы пайшлі на апошні штурм, замяніўшы Коваля на шостага палявога. І, на шчасце, скарысталі сваё! Аляксей Калюжны адзначыўся за трыццаць адну секунду да фінальнай серэны! 2:2!
Нас чакаў овертайм, дзе абедзве каманды шайбамі так і не адзначыліся.
На жаль, у серыі булітаў фіны былі бездакорнымі. А вось Сяргей Касціцын свой «хакейны пенальці» не рэалізаваў. Беларусы набралі адзін пункт. Цяпер для выхад у плэй-оф дастаткова набраць яшчэ адзін пункт у заўтрашняй гульні з Нарвегіяй (пачатак а 13:15).
Група В: ЗША — 15 (6 гульняў), Расія — 14, Фінляндыя — 14, Беларусь — 11, Славакія — 8, Нарвегія — 6, Данія — 4, Славенія — 0.
Зміцер Панкавец, nn.by