Дырэктар саўгаса абмацюкаў маладога спецыяліста, які папрасіў службовае жыллё

Дырэктар прадпрыемства "Неўскі-агра" з Бабруйскага раёна Аляксандр Атрохаў матам адказаў на скаргу маладога спецыяліста. Нядаўні студэнт хацеў атрымаць службовае жыллё, якое належыць яму паводле закона. Пра здарэнне піша Еўрарадыё.

Аўдыёзапіс размовы размясціў у інтэрнэце блогер NEXTA. Асцярожна! Прамова Атрохава амаль уся нецэнзурная.
"Ты … не робіш днямі, … Я б цябе забіў. Ходзіш, …, як чучала. Ты сябе бачыў, …? У люстэрка глядзеўся? На цябе брыдка глядзець, … Спецыяліст, …", — кажа дырэктар.
Дырэктар "Неўскага-агра" таксама пагражаў маладому спецыялісту з далейшым працаўладкаваннем. Ён заявіў, што сам гатовы звольніць хлопца.
"Ён мне нервы рваць будзе, … Працаваць ён не будзе, … Зараз камісія праверыць, складзем такую паперу. Паглядзім, што ты робіш, … А я ўпэўнены, што там будзе адно гаўно, … Сядзіш, …, як … ведае што, … Дзякуючы бухгалтару ты зараз тут працуеш. Я ўжо паўгода сказаў выперці цябе … адсюль. А яна цябе трывае дагэтуль", — кажа кіраўнік гаспадаркі.
У каментары "Нашай Ніве" Атрохаў пацвердзіў рэальнасць запісу. Ён расказаў, што гутарка адбывалася з Яўгенам Белавусавым, які працаваў у гаспадарцы бухгалтарам.
"Гэты чалавек падрабіў дакументы. Па падробленых дакументах прыйшоў на працу, нічога пра гэтую працу не ведаючы. Абавязкі свае не ведаў, паводзіў сябе па-хамску. Працу не выконваў, за яго па выніку працавалі іншыя. На заўвагі мае ён проста не рэагаваў, матываваў гэта тым, што ён інвалід", — падзяліўся падрабязнасцямі Атрохаў.
У Белавусава насамрэч ёсць праблемы са зрокам, ён мае трэцюю групу інваліднасці. Цяпер ён звольнены з гаспадаркі.
Сам Белавусаў сцвярджае, што канфлікт з начальствам пачаўся пасля таго, як у інтэрнаце, дзе ён жыў, пачаўся рамонт. Хлопца выселілі, аднак рамонт у інтэрнаце не закончылі. Калі ж ён прыйшоў да начальства прасіць, каб яго засялілі назад, то нарваўся на скандал.