«Карандаш» адмовіўся друкаваць бэйджы Руху «За Свабоду»

Бэйджы ініцыятыўнай групы прэтэндэнта ў дэпутаты Юрыя Меляшкевіча з лагатыпам Руху «За Свабоду» адмовіўся друкаваць копісалон «Карандаш», які знаходзіцца на вул. Хмяльніцкага.

Сябра Рады Руху Юры Меляшкевіч распавёў сайту Pyx.by пра сітуацыю:
— «Карандаш» спачатку надрукаваў бэйджы з інфармацыяй пра маю ініцыятыўную групу, а пасля я прыйшоў з новым макетам, дзе на іншым баку было напісана Рух «За Свабоду», яны адмовіліся рабіць.
Ён патлумачыў, што прадставіў у копісалон вытрымку са статута Руху «За Свабоду», у якой было ўказана пра выбары, а таксама рэгістрацыйны нумар арганізацыі ў Мінюсце. Але ўсе гэтыя доказы таго, што арганізацыя — зарэгістраваная, не паспрыялі друку матэрыялаў.
«З аднаго пункту гледжання, гэтая практыка звязаная з агульнай атмасферай страху, якая вельмі вялікая. З другога яны павінны забяспечваць выкананне паслугаў», — адзначыў Меляшкевіч.
Ён адзначыў, што такое стаўленне абмяжоўвае ягоныя правы як прэтэндэнта ў дэпутаты, а таксама права грамадзянаў на атрыманне інфармацыі, і абсалютна не абгрунтаванае.
Меляшкевіч накіраваў скаргу на дзеянне супрацоўнікаў кіраўніцтву кампаніі, якую будуць разглядаць на працягу месяца, а таксама плануе звярнуцца за тлумачэннямі ў ЦВК.
Пры гэтым, хаця агулам з "Карандашом" і раней былі праблемы па палітычных прычынах, але менавіта ў гэтым канкрэтным салоне такога не назіралася. «Думаю, што згубяць многа кліентаў, такія паводзіны не будуць спрыяць бізнесу», — заключыў сябра Рады Руху.
Вольга Быкоўская,  Pyx.by