«Паспрабаваў накінуцца на мяне». Васкрасенскі распавёў пра сустрэчу з Андрэем Пачобутам

Пра сваю сустрэчу з палітзняволеным журналістам Андрэем Пачобутам у Следчым камітэце распавёў 3 красавіка ў эфіры дзяржтэлеканала «Беларусь 1» прапагандыст Юрый Васкрасенскі. Пра гэта распавядае «Л*стэрка».

Са слоў праўладнага «палітолага», сустрэча была арганізавана па «просьбе польскага боку».

— Я звярнуўся да следчых органаў, і следчыя органы ласкава дазволілі сустрэцца нам з Пачобутам. Нам утрох: Пачобут, польскі амбасадар і я. Гэта сустрэча адбылася ў Следчым камітэце прыкладна паўтара гады таму. Мы сапраўды з польскім амбасадарам з мэтай нармалізацыі беларуска-польскіх адносін, спынення нейкай эскалацыі вырашылі прыбраць гэты камень спатыкнення, — сказаў Васкрасенскі.

Прапагандыст не распавёў, пра што канкрэтна ішла гаворка падчас сустрэчы. Аднак з яго слоў і каментароў вядучай можна зрабіць выснову, што ў Следчым камітэце палітвязню-журналісту, як тром іншым фігурантам «справы палякаў», прапанавалі вызваленне ў абмен на выезд у Польшчу. Як паведамлялася раней, Пачобут такія ўмовы не прыняў.

Лукашэнка заявіў, што згодны абмяняць Анджэя Пачобута на Латушку і «ўсіх членаў НАУ»

— Ён літаральна накінуўся... паспрабаваў накінуцца на мяне. Вядома, атрымаў адпаведны адпор. Але ён паводзіў сябе як самы сапраўдны сацыяпат. Для мяне дагэтуль з'яўляецца загадкай, чаму ён так паводзіў сябе, — абурыўся Васкрасенскі.

— Можа быць, у Польшчу не хоча вяртацца? — выказала здагадку вядучая.

Васкрасенскі дапусціў, што гэта магло быць адной з прычын такіх паводзін.

Нагадаем, у 2021 годзе ў Беларусі затрымалі пяць чалавек па так званай «справе Саюза палякаў». Пазней трох з іх (Панішаву, Цішкоўскую і Бярнацкую) адпусцілі з-пад варты і выслалі ў Польшчу. Яшчэ адзін фігурант справы, Андрэй Пачобут, ад вызвалення на такіх умовах адмовіўся. У лютым яго прызналі вінаватым у закліках да санкцый, а таксама распальванні варожасці і прысудзілі да васьмі гадоў калоніі. Таксама ад вызвалення ў абмен на выправаджванне з Беларусі адмовілася кіраўнік арганізацыі Анжаліка Борыс. 25 сакавіка 2022-га яе выпусцілі з СІЗА пад хатні арышт. Пазней стала вядома, што Аляксандр Лукашэнка яе памілаваў.