Праціўнікі акумулятарнага завода абмеркавалі суды над актывістамі

Каля поўдня 1 снежня на плошчы Леніна ў Брэсце чарговы раз сабраліся праціўнікі будаўніцтва акумулятарнага завода. Такія сустрэчы праходзяць тут кожную нядзелю з 25 лютага 2018 года.

Па дадзеных праваабаронцы Рамана Кісляка, а 12.40 на плошчы было не менш як 110 чалавек. Міліцыя праз мегафон папярэджвала сабраных аб адказнасці за правядзенне несанкцыянаванай акцыі.
Удзельнікі сустрэчы абмяркоўвалі маючыя адбыцца ў снежні суды над двума супернікамі акумулятарнага завода. Справа Андрэя Сліжа буддзе разглядацца ўу судзе Ленінскага раёна 10 снежня, Аляксандра Марачеўскага — у гэтым жа судзе 12 снежня.
27 лістапада ў Ленінскім РАУС Брэста ў дачыненні Сліжа і Марачеўскага склалі пратаколы на падставе ч. 3 арт. 23.34 КаАП (парушэнне парадку арганізацыі або правядзення масавых мерапрыемстваў паўторна на працягу года). 25 кастрычніка яны прынялі ўдзел у перадвыбарчым агітацыйным пікеце кандыдата ў дэпутаты на парламенцкіх выбарах актывісткі «Еўрапейскай Беларусі» Паліны Шaрэнда-Панасюк на вуліцы Савецкай у Брэсце. Актывісты раздавалі на гэтым пікеце інфармацыйныя матэрыялы з лагатыпам «Стоп завод» аб шкодным уздзеянні свінцу на арганізм чалавека, так як у перадвыбарнай праграме Шaрэнда-Панасюк было патрабаванне зачыніць акумулятарны завод.
Марачеўскі сёння на сустрэчы назваў дзеянні ўладаў «вакханаліяй». У сваю чаргу актывіст Анатоль Ярмоленка назваў адміністрацыйны пераслед Сліжа і Марачеўскага «бязмежжам». «Мабыць, нас хочуць запалохаць, але гэта ва ўладаў не атрымаецца», — адзначыў ён.
Кісляк лічыць, што ўлады баяцца грамадскага пратэсту супраць акумулятарнага завода і «зноў пачалі ціснуць на актывістаў». «Мы гэта ўжо праходзілі і не спынім нашу кампанію да канчатковага закрыцця гэтага завода», — заявіў ён.
Пасля сустрэчы на ​​плошчы, якая доўжылася прыкладна да 12.40, праціўнікі будаўніцтва завода прайшлі па цэнтральных вуліцах Брэста — Пушкінскай і Савецкай да кінатэатра «Беларусь».
naviny.by