Райвыканкам правёў выяздное пасяджэнне пасля звароту Руху «За Свабоду»
Зварот з 55 подпісамі ў падтрымку ініцыятывы па змене заканадаўства «Аб зямлі», якую прасоўвае Рух «За Свабоду», стаў падставай для правядзення выязнога пасяджэння Лідскага райвыканкама ў Бярозаўцы.
Кампанію па падрыхтоўцы зменаў у зямельнае заканадаўства ў падтрымку ініцыятывы дэпутата Ганны Канапацкай Рух «За Свабоду» распачаў у чэрвені. Сярод асноўных прапановаў скарачэнне падставаў для канфіскацыі зямлі для дзяржаўных патрэбаў, зняцце забаронаў на здзелкі з участкамі, адмена абмежаванняў па іпатэцы і закладу права арэнды, выключэнне платы за заключэнне дамовы арэнды і магчымасці ў аднабаковым парадку зменаў памеру арэнднай платы.
Кампаніі ў падтрымку ініцыятывы праходзяць у Мінску і шэрагу рэгіёнаў. У Бярозаўцы пад зваротам былі сабраныя 55 подпісаў мясцовых жыхароў, якія актывісты Руху накіравалі ў райвыканкам і памочніку дэпутата Палаты прадстаўнікоў ад Дзятлаўскай выбарчай акругі.
«Ініцыятараў звароту запрасілі на сустрэчу 31 студзеня», — распавёў сайту Pyx.by сябра Руху «За Свабоду» Сяргей Пантус.
Па ягоных словах, заяўнікаў на сустрэчы прадстаўляў ён і журналіст Юрый Дзяшук, акрамя таго на паседжанні прысутнічалі пяць чалавек, сярод якіх прадстаўнікі райвыканкама і старшыня бярозаўскага гарсавета Валерый Яводзік. Сустрэча працягнулася пяць хвілінаў.
«Мы вас запрасілі, бо зварот з 55 подпісамі і мы павінны адрэагаваць, працаваць з грамадствам. Вы просіце падтрымаць заканадаўчую ініцыятыву і ацаніць законапраект», — абвясціў прадстаўнік райвыканкама.
Першы пункт, па ягоных словах, не ў іх кампетэнцыі. А ў абмеркаванні райвыканкам гатовы паўдзельнічаць, калі гэты дакумент, у адпаведнасці з новым заканадаўствам, будзе размешчаны на сайце Pravo.by.
«З аднаго боку, чыноўнікі адсправаздачыліся для галачкі: з актывістамі працуем. А з іншага, першы раз запрасілі на выязное пасяджэнне, калі такая тэндэнцыя працягнецца, будзе добра», — лічыць Сяргей Пантус.
Адзначым, што ў некалькіх рэгіёнах дэпутаты і выканкамы ужо адмовіліся рэагаваць на звароты з прапановай падтрымаць змены ў заканадаўства «Аб зямлі» і «Аб грамадскіх слуханнях», кампанію ў падтрымку якіх арганізаваў Рух «За Свабоду».
Паводле pyx.by