Затрымалі і жонку вядомага рэпетытара Яўгена Лівянта. Дапоўнена: таксама затрыманы саўладальнік цэнтра «100 балаў»

У Мінску затрымалі жонку вядомага рэпетытара Яўгена Лівянта. Пра гэта «Л*стэрку» паведамілі дзве не звязаныя паміж сабой крыніцы.

У аўторак, 27 снежня ў Мінску затрымалі вядомага рэпетытара Яўгена Лівянта. У аўторак, 3 студзеня, адзін з праўладных тэлеграм-каналаў паведаміў аб затрыманні дачкі і зяця педагога. Пасля гэтага выявілася, што Юлія — жонка Яўгена Барысавіча — таксама не на волі.

Гэтую інфармацыю пацвердзіў знаёмы Яўгена Лівянта. Паводле яго слоў, рэпетытара, яго жонку, дачку і зяця затрымалі ў адзін дзень.

«Цяпер яны знаходзяцца на Акрэсціна», — распавёў знаёмы педагога.

Наколькі вядома знаёмаму, першапачаткова педагог і члены яго сям'і былі затрыманыя па «адміністрацыйцы».

«Але вы разумееце, што там мяняецца ўсё ад гадзіны да гадзіны», — удакладніў суразмоўца.

Яўген Лівянт — вядомы беларускі педагог, рэпетытар па фізіцы і матэматыцы, кіраўнік рэпетытарскага цэнтра «100 балаў», які займаецца падрыхтоўкай абітурыентаў да ЦТ.

Пасля яго затрымання сілавікі заявілі, што ў 2020 годзе ён «удзельнічаў не толькі ў перакрыцці дарог і масавых парушэннях парадку» і «распачаў спробу захопу дзяржаўнай улады» шляхам удзелу ў каардынацыйнай радзе, а яго цэнтр нібыта незаконна ажыццяўляў адукацыйную дзейнасць з дапамогай змовы з прыватнай школай.

UPD: Таксама стала вядома пра затрыманне саўладальніка адукацыйнага цэнтра «100 балаў» Аляксея Іванова. Сілавікі запісалі з ім «пакаяльнае відэа», якое з'явілася ў адным з праўладных тэлеграм-каналаў. У ім затрыманага прымушаюць назваць свой даход, а таксама прызнацца ва ўдзеле ў акцыях пратэсту ў 2020 годзе.