Стэфановіч: З каменданцкай гадзінай у Глыбокім няхай разбіраецца пракуратура
СМІ Беларусі абляцела навіна аб тым, што ў Глыбокім уведзена каменданцкая гадзіна з-за вучэнняў "Захад-2017". Спасылаюцца пры гэтым на паведамленне на сайце Глыбоцкага райвыканкама.
Скрын-шот з сайта Глыбоцкага райвыканкама.
“У сувязі з правядзеннем на тэрыторыі Глыбоцкага раёна вучэнняў па тэрытарыяльнай абароне ў рамках сумесных стратэгічных вучэнняў Узброеных сіл Беларусі і Расіі"Захад–2017"у г. Глыбокае з 14 па 20 верасня 2017 года са 22.00 да 6.00 уводзіцца каменданцкая гадзіна. У адпаведнасці з Законам Рэспублікі Беларусь «Аб ваенным становішчы», падчас каменданцкай гадзіны забараняецца знаходзіцца (без неабходнасці) па-за жыллём, перамяшчацца паміж населенымі пунктамі без дакументаў, якія пацвярджаюць асобу”, — пазначана на сайце Глыбоцкага райвыканкама
Праваабаронца “Вясны”Валянцін Стэфановіч з гэтай нагоды неадкладна звярнуўся ў Глыбоцкую раённую пракуратуру з заявай, у якой просіць правесці праверку ўказаных фактаў і пры выяўленні парушэнняў дзеючага заканадаўства з боку службовых асобаў Глыбоцкага райвыканкама прыняць адпаведныя меры пракурорскага рэагавання.
Таксама Стэфановіч прапаноўвае адмяніць адпаведнае рашэнне Глыбоцкага райвыканкама аб увядзенні каменданцкай гадзіны на тэрыторыі Глыбоцкага р-ну з 14 па 20 верасня 2017 г. у сувязі з яго незаконнасцю.
Праваабаронца перакананы ў тым, што мясцовыя ўлады парушылі шэраг законаў, у прыватнасці, арт. 23 Канстытуцыі Рэспублікі Беларусь і Закон Рэспублікі Беларусь “Аб ваенным становішчы”:
"Згодна з арт. 23 Канстытуцыі Рэспублікі Беларусь абмежаванне правоў і свабодаў асобы дапускаецца толькі ў выпадках, прадугледжаным законам, у інтарэсах нацыянальнай бяспекі, грамадскага парадку, абароны маральнасці, здароўя насельніцтва, правоў і свабодаў іншых асобаў.
Закон Рэспублікі Беларусь “Аб вайсковым становішчы” № 185-3 ад 13 студзеня 2003 г. (са зменамі і дапаўненнямі) прадугледжвае абмежаванні правоў і свабодаў асобы ў выпадку абвяшчэння ваеннага становішча. Правядзенне вайсковых вучэнняў на пэўнай тэрыторыі краіны не з’яўляюцца такімі падставамі і, адпаведна, не могуць цягнуць з сабой абмежаванні правоў і свабодаў грамадзян".
На дадзены момант, пасля з’яўлення інфармацыі пра каменданцкую гадзіну ў СМІ, гэтае паведамленне было выдалена са старонкі сайту Глыбоцкага райвыканкаму.