Шэсць крокаў да пашырэння беларускай мовы ў інтэрнэце
"Умовы для мовы" праводзяць кампанію за беларускую мову ў інтэрнэце. Вы можаце далучыцца.
“Навіны, сайты, мабільныя праграмы — усё пераважна па-руску. Па-беларуску немагчыма даведацца, а якой прымае лекар у лякарні, замовіць ежу, даведацца пра курсы кіроўцаў, загугліць рацэпт, пачытаць пра моду і гэтак далей. У большасці выпадкаў уладальнікі парталаў і мабільных праграм проста не падумалі пра тое, што адсутнасць беларускай мовы можа дыскрымінаваць. Варта напісаць ім пра гэта,” — кажа прадстаўніца ініцыятывы "Умовы для мовы" Аліна Нагорная.
Кампанія складаецца з некалькіх крокаў. Ужо апублікаваныя 6 крокаў з іх: беларуская мова на анлайн-мапах, беларуская мова на сайтах выканкамаў і іншых дзяржаўных установаў, беларуская мова ў мабільных праграмах, беларуская мова ў анлайн-крамах, беларуская мова на сайтах лякарняў і медыцынскіх цэнтраў, беларуская мова ў інстаграм.
Хочаце, каб беларускай мовы ў інтэрнэце было больш? Далучайцеся да кампаніі “е-Мова”!
1 крок — беларуская мова на гугл-мапах!
Вы можаце дадаваць назвы месцаў па-беларуску. Палацаў, гандлёвых цэнтраў, лякарняў, кінатэатраў, стадыёнаў — любых месцаў. Для гэтага трэба: абраць месца, націснуць "рэдагаваць", дадаць беларускую мову і выправіць лацінку (калі ёсць), даслаць выпраўленні. Важна, каб беларуская мова стаяла ў наладах гугла.
2 крок — беларуская мова на сайтах выканкамаў і іншых дзяржаўных установаў!
Класіка — гэта калі беларуская мова толькі на галоўнай старонцы. Часам можна яшчэ сустрэць цікавыя памылкі. Бывае, што беларускай мовы наогул няма. А бывае, што старонка цалкам перакладаецца гугл-транслейтам. Яшчэ сустракалі, калі беларуская версія зусім маленькая і на ёй нават адраса выканкама не знайсці.
Карацей, варта заняць чыноўнікаў карыснай справай. Проста прааналізуйце сайт любой дзяржустановы, знайдзіце на ім форму для электронных зваротаў і напішыце што не так. Тут спасылкі на ўсе сайты выканкамаў Беларусі.
3 крок — беларуская мова ў мабільных праграмах!
Напішыце распрацоўшчыкам мабільных дадаткаў, якімі вы карыстаецеся, прапанову дадаць версію на беларускай мове.
4 крок — беларуская мова ў анлайн-крамах!
Oz.by, е-дастаўка, Буслік, 21vek, wildberries… — усё па-руску.
Нагадайце кіраўніцтву крамаў, у якіх вы набываеце, што мы ў Беларусі і беларуская мова тут дзяржаўная. А таксама, што жаданне кліента — закон. Знайдзіце на сайце крамы форму зваротнай сувязі і напішыце прапанову дадаць на сайт беларускамоўную версію.
5 крок — беларуская мова на сайтах лякарняў і медыцынскіх цэнтраў!
Мы ўсе ходзім да лекараў. І каб патрапіць да іх, па-руску гуглім тэлефоны, каб запісацца. Чытаем па-руску інфармацыю пра паслугі на сайце. А ўсё таму, што ў Беларусі па-беларуску медыцынскай інфармацыі амаль не існуе. І яна не з’явіцца, пакуль вы не дашлеце зварот. Мы стварылі зварот. Скапіюйце яго і дашліце на электронную пошту лякарняў і медцэнтраў, паслугамі якіх вы карыстаецеся.
Я карыстаюся медыцынскімі паслугамі вашай установы. Каб атрымліваць неабходную інфармацыю, я наведваю сайт вашай установы.
Інфармацыя на вашым сайце падаецца выключна на рускай мове. Такая практыка дыскрымінуе грамадзян, якія карыстаюцца беларускай мовай, а таксама ставіць пад пагрозу іх жыццё і здароўе, бо яны могуць недакладна зразумець інфармацыю, прадстаўленую на рускай мове і зрабіць высновы, не адпаведныя рэчаіснасці.
На падставе адзначанага,
ПРАШУ:1. Дадаць на сайт вашай установы версію на беларускай мове;2. У адпаведнасці з Законам “Аб зваротах грамадзян і юрыдычных асоб” даць адказ на мой зварот у вызначаны законам тэрмін.
6 крок — беларуская мова ў інстаграм!
Інстаграм ужо даўно перастаў быць месцам, дзе мы глядзім толькі фотачкі нашых сяброў. Цяпер мы тут чытаем навіны, замаўляем тавары, шукаем псіхолагаў, масажыстаў і цырульнікаў, сочым за навінкамі любімых брэндаў, чытаем парады па харчаванні, па фізічных практыкаваннях, глядзім на прыгажосць ад беларускіх рамеснікаў, смяемся з розных мемаў… Інстаграм — гэта цэлы свет інфармацыі і паслуг. І для Беларусі гэты свет рускамоўны.
Як гэта выправіць? Вельмі проста.
Капіюем гэты пост і ставім яго ў інсту з любой вашай фоткай. Абавязкова тэгаем як мага больш старонак брэндаў, блогераў, сяброў, спецыялістаў — усіх, каго вы чытаеце па-руску, а хацелі б чытаць па-беларуску. Так людзі даведаюцца пра вашае жаданне і, магчыма, для іх гэта стане штуршком да беларускай мовы.
Будуць публікавацца новыя крокі. Сачыце за навінамі ў сацсетках “Умовы для мовы”.
тэлеграм інстаграмфэйсбук вкДалучайцеся да кампаніі і дзяліцеся скрынамі сваіх дзеянняў у сацсетках з хэштэгам #емова. Актыўныя ўдзельнікі кампаніі атрымаюць падарункі (бірулькі, налепкі). А сярод самых актыўных удзельнікаў кампаніі будуць разыграныя паўэрбэнгі, а таксама кнігі Аліны Нагорнай “Мова 404”.