У Беларусі зноў заняліся дармаедамі: праводзіцца «актуалізацыя базы даных»

Жыхары Аршанскага раёна пачалі атрымліваць паведамленні ад мясцовых уладаў, піша «Салідарнасць».

У паведамленні, якое некаторыя аршанцы атрымалі па пошце, адзначаецца, што ў сувязі з уступленнем у сілу дэкрэта №3 "Аб садзейнічанні занятасці насельніцтва" ў Аршанскім раёне "праводзіцца работа па актуалізацыі базы даных”.

Чыноўнікі прапануюць беларусам, якія працуюць за мяжой, падаць у выканкам дакументы, "якія пацвярджаюць факт занятасці з замежным наймальнікам".

Студэнты, якія навучаюцца за мяжой, павінны даць даведкі з месца вучобы, а беларусы, звольненыя з месца працы, — працоўную кніжку і даведку ад наймальніка.

Гэтыя і іншыя катэгорыі грамадзян могуць быць выключаныя з так званай "базы дармаедаў", калі дадуць чыноўнікам патрэбныя дакументы.

Нагадаем, што скандальны дэкрэт №3 у 2017 годзе выклікаў масавыя пратэсты беларусаў як у Мінску, так і рэгіёнах Беларусі. Тым не менш, Аляксандр Лукашэнка не адмовіўся ад сваёй ідэі — у абноўленай версіі дэкрэта штрафы незанятым у эканоміцы Беларусі грамадзянам замянілі на поўную аплату за некаторыя паслугі ЖКГ.

Паводле gazetaby.com