У Брэсце пачалі судзіць 11-ю групу па «карагоднай справе». Па ёй ужо асудзілі больш за сто чалавек
Чарговую частку «карагоднай справы» пачалі разглядаць у Маскоўскім судзе Брэста 1 снежня. На лаве падсудных 12 чалавек.
Спіс абвінавачаных:
- Аляксандр Бадавец,
- Марына Ушыўкава,
- Барыс Галанін,
- Уладзімер Гарбавец,
- Ігар Грабінскі,
- Кірыл Дарашчук,
- Анастасія Жукавец,
- Дзмітрый Капылоў,
- Міхаіл Любчук,
- Вольга Федарэнка,
- Павал Хамічук,
- Кацярына Шпак.
Як паведамляюць брэсцкія праваабаронцы, абвінавачаны Міхаіл Любчук не з’явіўся ў суд — яго абвясцілі ў вышук. Але ў гэтай групе вырашылі судзіць 23-гадовага палітвязня Віктара Кухарчука, які ўтрымліваецца ў СІЗА Брэста з 8 кастрычніка, піша Радыё Свабода.
Іх, як і іншых фігурантаў, вінавацяць у «грубым парушэнні грамадскага парадку» (ч. 1 арт. 342 Крымінальнага кодэксу Беларусі).
Справу разглядае суддзя Тацяна Лаўранюк.
«Карагодная справа» у Брэсце — адзін з самых буйных палітычных працэсаў за апошнія паўтара года ў Беларусі. Раней выракі ў гэтай справе атрымалі ўжо 102 асобы. Падзеі, за якія завялі справу, адбыліся 13 верасня 2020 года. Людзі на скрыжаванні вуліц вадзілі вялікі карагод пад музыку, спявалі і танчылі. Удзельнікі гавораць пра характар тых падзей як «атмасферу свята».
Па «справе карагодаў» агулам прысудзілі:
- 82,5 года «хіміі»;
- 71 год «хатняй хіміі»;
- 12 гадоў і 2 месяцы калоніі.