Журналіст Дзяніс Івашын у Гродзенскай турме №1. Перадачу яму не прынялі (абноўлена)

У Гродне каля 18-й гадзіны затрымалі журналіста Дзяніса Івашына. Больш за тры гадзіны ў яго кватэры цягнуўся пеатрус.

Затрыманне журналіста Дзяніса Івашына адбылося прыкладна а 18-й гадзіне. Паводле відавочцаў, журналіста затрымалі ў кватэры, дзе ён пражывае. Перад гэтым да дома пад’ехаў сіні мікрааўтобус.

Маці журналіста Людміла Івашына распавяла «Новаму Часу», што пасля гэтага дома ў Дзяніса адбываўся ператрус, які праводзілі супрацоўнікі КДБ.

Прыкладна а 22.30 ператрус у кватэры Дзяніса Івашына скончыўся. Адразу пасля гэтага супрацоўнікі КДБ паехалі ладзіць ператрус у яго бацькоў, якія жывуць у прыгарадзе Гродна.

І толькі каля 4-х ночы Вольга, жонка Дзяініса Івашына, паведаміла:

— Дзяніса трымаюць у вязніцы. У хаце і на лецішчы быў ператрус, вымалі ўсе носьбіты інфармацыі (тэлефоны, ноўтбукі, кампутары), сім-карты, банкаўскія картки, кнігі, нататнікі, запісы, грошы ды розную драбязу, кшталту сцяжкоў, значкаў, візітак ды інш. Вельмі цікавіла ўсе, звязанае з Украінай, хоць артыкул крымінальны ў пастанове на ператрус нібы за распаўсюд асабістай інфармацыі".

Зараз Дзяніс знаходзіцца ў турме №1 Гродна.

UPD. Як паведаміла на сваёй старонцы ў фэйсбуку Вольга Івашына, жонка Дзяніса, марнай апынулася спроба перадаць яму перадачу.

— Перадачу для Дзяніса не узялi ў вязнiцу, сцвярджаюць, што ў IЧУ, а можa наогул куды перавялi. Высвятляем, — адзначыла Вольга Івашына.