У Шклове будуць судзіць прадпрымальніка за леташняе здарэнне на фэсце ў Александрыі

У Шклове будуць судзіць 38-гадовага прадпрымальніка з Магілёва за здарэнне ў ліпені 2021-га на фэсце ў Александрыі. Яго абвінавачваюць у «аказанні паслуг, якія загадзя не адпавядаюць патрабаванням бяспекі для жыцця ці здароўя спажыўцоў, што пацягнула па неасцярожнасці прычыненне менш цяжкага цялеснага пашкоджання», паведамляе служба інфармацыі пракуратуры Магілёўскай вобласці.

Прыватнае прадпрыемства мужчыны аказвала паслугі з выкарыстаннем надзіманага гульнявога абсталявання. Летам мінулага года абласныя ўлады далі яму дазвол на аказанне паслуг на свяце «Александрыя збірае сяброў» і на рэспубліканскім «Купаллі». На адкрытай пляцоўцы ў аграгарадку Александрыя былі ўсталяваныя атракцыёны, якія пачалі працаваць 10 ліпеня. Сцвярджаецца, што дырэктар прадпрыемства ведаў, што ў надзіманым абсталяванні «элементы жорсткага мацавання выраблены самаробным спосабам і не адпавядаюць устаноўленым патрабаванням», а гэта стварала пагрозу бяспекі кліентаў.

У выніку падчас свята парыў ветру сарваў надзіманы атракцыён і падняў яго ў паветра. Пракуратура піша, што пацярпела дзяўчынка 2009 года нараджэння. У яе «менш цяжкія цялесныя пашкоджанні», як і ў мужчыны 2001 года нараджэння. Прадпрымальнік не знаходзіцца за кратамі, яму абралі меру стрымання ў выглядзе закладу.

Нагадаем, у разгар свята вецер падняў вялізныя надзіманыя батуты, на якіх былі дзеці, у паветра. Яны некалькі разоў перавярнуліся і паваліліся на зямлю. У бальніцу для агляду завезлі сем чалавек.

Мужчыну, які зняў на відэа інцыдэнт з атракцыёнамі ў Александрыі, асудзілі на адміністрацыйны арышт.

Паводле «Еўрарадыё».

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: