У Ліёне адкрылася ганаровае консульства Беларусі

Як паведамляе прэс-служба пасольства Беларусі ў Францыі, ганаровае консульства размешчана на адной з самых вядомых плошчаў Ліёна — Антанен Пансэ. 



Ганаровы консул Беларусі ў Ліоне Жан Жак Ранк будзе ажыццяўляць сваю дзейнасць у консульскай акрузе, якая ўключае ў сябе рэгіён Рона — Альпы. Ён з’яўляецца адным з самых вядомых адвакатаў у дадзеным рэгіёне Францыі, паведамілі ў прэс-службе пасольства. 
Як адзначыў на афіцыйным прыёме пасол Беларусі Павел Латушка, Ганаровае консульства ў Ліёне з’яўляецца першай падобнай установай Беларусі ў Францыі. Дыпламат падкрэсліў, што Беларусь зацікаўлена ў развіцці ўзаемакарысных адносін з Францыяй і адзначыў прыярытэтнасць развіцця міжрэгіянальнага беларуска-французскага супрацоўніцтва. 
Пасол Беларусі падкрэсліў, што галоўнай задачай дзейнасці Ганаровага консула Беларусі ў Ліёне будзе з’яўляцца "спрыянне развіццю эканамічнага супрацоўніцтва праз кантакты дзелавых колаў дзвюх краін, рэалізацыя сумесных праектаў у галіне культуры і адукацыі, а таксама консульска-прававая дапамога грамадзянам Беларусі". 
Латушка паведаміў, што на 26 студзеня 2016 года у Ліёне адбудзецца прэзентацыя магчымасцяў гандлёва-эканамічнага і інвестыцыйнага супрацоўніцтва Беларусі, якая будзе арганізавана сумесна з Беларускай гандлёва-прамысловай палатай і гандлёва-прамысловай палатай Ліёна і рэгіёна Рона — Альпы. 
На 17 красавіка 2016 года запланаваны Дзень беларускай культуры ў Ліёне, а ў чэрвені Беларусь прыме ўдзел у прэзентацыі ганаровых консульстваў, якія знаходзяцца ў Ліёне. 
Латушка адзначыў, што Беларусь мае даўнія гістарычныя сувязі з Ліёнам. Паводле яго слоў, у Гродне знаходзіцца помнік Жану Эмануілу Жэльберу, выхадцу з Ліёна, які заснаваў першую медыцынскую акадэмію ў Беларусі, аптэку, акушэрскую і ветэрынарную школы, Батанічны сад. Беларусь і Ліён, нагадаў дыпламат, звязвае таксама традыцыя ткацтва слуцкіх паясоў. 
Ганаровы консул Беларусі Жан-Жак Ранк падкрэсліў, што ў 2016 годзе Мінск і Ліён будуць адзначаць 40-годдзе ўсталявання пабрацімскіх сувязяў.
Паводле "Радыё Рацыя"