Выбухі на аэрадроме ў Мачулішчах, што вядома (дапоўнена)

Пра некалькі выбухаў на аэрадроме ў Мачулішчах паведамляла і ініцыятыва BYPOL, і чытачы. Журналісты «Люстэрка» сабралі ўсё, што вядома пра здарэнне.

Што адбылося?

У BYPOL паведамілі, што ўдзельнікі плана «Перамога» распавялі пра два выбухі ў Мачулішчах раніцай. Па іх інфармацыі, у выніку быў пашкоджаны расійскі ваенна-транспартны самалёт і снегаўборачная тэхніка. Мяркуючы па паведамленнях у мясцовых чатах, гучныя гукі былі чутныя ў раёне 8-9.40 раніцы. Некаторыя кажуць, што чулі моцны выбух ноччу.
Пасля таго, што здарылася, як пісалі жыхары навакольных населеных пунктаў у мясцовых телеграм-чатах, ля вайсковага аэрадрома бачылі вялікую колькасць ваенных. Са слоў адной з карыстальніц, на аэрадром прыязджалі Следчы камітэт і хуткая, «стаялі вайскоўцы і аўтаматчыкі». У іншым чаце людзі пісалі, што вуліца Спартыўная была «ўздоўж забітая тэхнікай з вайскоўцамі ў броніках», «у той бок нядаўна праехала сем ваенных машын з аўтаматчыкамі».
Вакол бачылі таксама машыны ДАІ, яны правяралі багажнікі праязджаюць аўто, сумкі і дакументы кіроўцаў. Паводле інфармацыі тэлеграм-канала «Беларусь за МКАДам», экіпажы дагэтуль працуюць па дарозе са Слуцка ў Менск, аўто правяраюць каля вёсак Дзергаі і Плябанцы.
Пазней паведамленні ў чатах сталі выдаляць. Як піша телеграм-канал «МотолькоПомоги», пачаў хадзіць па кватэрах АМАП у поўным абмундзіраванні. «Па словах людзей, ходзяць па сваіх БЧБ-спісах, шукаюць, хто штосьці зрабіў». А тэрыторыю вакол Мачулішчаў паўтары гадзіны патруляваў верталёт.
Бліжэй да вечара пра выбухі пад Менскам напісаў расейскі праўладны ваенкор Сямён Пегаў, аўтар праекта WarGonzo. Па яго словах, інфармацыю пацвердзілі «крыніцы ў Беларусі». Ён дадаў, што, «хутчэй за ўсё», гэта былі «атакі беспілотнікаў на вайсковую інфраструктуру, на якой могуць быць разгорнутыя ў тым ліку аб'екты расейскіх ВКС».
Паводле наяўнай у BYPOL інфармацыі, у Мачулішчах быў падарваны самалёт ДРЛА А-50 (самалёт далёкага радыёлакацыйнага выяўлення і кіравання).
«У выніку двух выбухаў пашкоджанні атрымалі пярэдняя і цэнтральная часткі самалёта, пашкоджаная авіёніка і радыёлакацыйная антэна. Пашкоджанні сур'ёзныя, самалёт дакладна ўжо нікуды не паляціць», — гаворыцца ў паведамленні ініцыятывы.

Што кажуць у Мінабароны і МНС

У цэнтры аператыўнага кіравання МНС па Мінскім раёне журналістцы «Люстэрка», якая патэлефанавала як жыхарка рэгіёна, сказалі, што інфармацыя аб выбухах не паступала.
Міністэрства абароны Беларусі таксама не каментавала сітуацыю. Мы таксама патэлефанавалі ў ведамства па нумары «Тэлефона даверу», супрацоўнік па тэлефоне толькі, як адбывалася раней, супакоіў:
— Вы ведаеце, там нічога сур'ёзнага не адбылося, можаце не перажываць.
— Людзі кажуць, выбухі былі. Нешта адбылося?
— Ну, гэта воплескі. Нічога страшнага не адбылося.
— Ясна. А чаму ваенных там тады так шмат?
— Ну, прыехалі. Трэніруюцца, вучацца. Нічога наогул, можаце не перажываць, — запэўнілі ў Мінабароны і не сталі агучваць падрабязнасці.
А тым часам Кіраўнік Bypol Аляксандр Азараў пацвердзіў «Нашай Ніве», што да дыверсіі на аэрадроме ў Мачулішчах датычныя беларускія партызаны.
Азараў заявіў, што на аэрадроме ў Мачулішчах беларускія партызаны, удзельнікі плана «Перамога», раніцай 26 лютага правялі дыверсію. Па словах прадстаўніка BYPOL, партызаны скінулі з дрона дзве выбуховыя прылады на самалёт А-50 (савецкі і расійскі самалёт далёкага радыёлакацыйнага выяўлення і кіравання), які стаяў на ўзлётна-пасадачнай паласе.
Таксама ён дадаў, што самалёт моцна пацярпеў "і лётаць ужо не зможа". Пацярпелі пярэдняя і цэнтральная часткі самалёта, пашкоджана авіёніка і радыёлакацыйная антэна.
— Гэты самалёт у Беларусі адзін. Калі ён узлятаў падчас апошніх лётных вучэнняў, ва Украіне аб'яўлялі паветраную трывогу, таму што ён карэктуе ракетныя ўдары для бамбавікоў. Ён карэктуе дзеянне ўсёй варожай авіяцыі. Гэта вельмі важны і дарагі самалёт, — патлумачыў Азараў і расказаў аб мэтах дыверсіі. — Расея — наш агульны вораг, з якім мы змагаемся разам з украінцамі. І мы змагаемся за незалежную Беларусь.
Ён таксама дадаў, што інфармацыі пра пацярпелых расейскіх або беларускіх вайскоўцаў падчас дыверсіі няма. А партызаны, якія маюць дачыненне да яе, ўжо знаходзяцца ў бяспечным месцы. Як ён пацвердзіў «Белсату», гэтыя людзі ўжо выехалі за мяжу.
У першыя дні вайны Генеральны штаб ВСУ паведамляў, што кіраванне і пасадка расійскай авіяцыі ажыццяўлялася самалётамі А-50 з тэрыторыі Мінскай вобласці і Крыма. У сакавіку 2022 года, як мяркуецца, гэты вайсковы самалёт заўважалі над Гомелем і Баранавічамі.