Вынесены прысуд за двайное забойства ў школе ў Стоўбцах

Дзяржаўны абвінаваўца прасіў суд пакараць Вадзіма М. максімальна магчымым тэрмінам. Прысуд агучылі ў будынку суда Стаўбцоўскага раёна, справу разглядаў Мінскі абласны суд, перадае Радыё Свабода.

Разгляд справы пачаўся 19 жніўня, працэс праходзіў у закрытым рэжыме. Падчас судовых спрэчак дзяржаўны абвінаваўца папрасіў пакараць Вадзіма М. зняволеннем на 13 гадоў. Вядома таксама, што абвінавачаны прызнаў сваю віну часткова. У выніку суд прысудзіў Вадзіму М. пакаранне ў выглядзе 13 гадоў калоніі.
Суд таксама пастанавіў спагнаць 110 тысяч рублёў кампенсацыі для сямʼі забітай настаўніцы.
Вадзіма М. абвінавачвалі ў злачынствах, прадугледжаных:
— ч. 3 арт. 339 (хуліганства з выкарыстаннем зброі);
— пп.1, 6, 13 ч. 2 арт 139 (забойства дзвюх і больш асобаў з асаблівай жорсткасцю з хуліганскіх матываў);
ч.1 арт.14 (замах на злачынства);— пп.1, 6, 10, 13 ч. 2 арт. 139 (забойства дзвюх і больш асобаў з асаблівай жорсткасцю з хуліганскіх матываў і забойства асобы ў сувязі з выкананнем ёй службовых абавязкаў).
Усе ўдзельнікі працэсу ў першы дзень пасля яго пачатку далі падпіску аб невыдаванні матэрыялаў справы, яны не маюць права расказваць пра тое, што адбывалася ў судовай залі падчас разгляду працэсу.
Разгляд справы прайшоў у закрытым рэжыме (паводле ч. 2 арт. 23 УПК), бо М. не дасягнуў 16-гадовага ўзросту на момант злачынстваў, у якіх яго абвінавачваюць. У матэрыялах справы былі звесткі пра стан ягонага здароўя, якія складаюць медыцынскую тайну (арт. 46 закону «Аб ахове здароўя»).
Першапачаткова на паседжанне збіраліся дапусціць толькі бацькоў абвінавачанага, а таксама па адным пацярпелым — мужа загінулай настаўніцы і бацьку 11-класніка Аляксандра Р. Аднак на першым паседжанні суддзя пагадзіўся прызнаць пацярпелымі таксама сястру настаўніцы Марыны Пархімовіч і яе сына.
Пачынаючы з 19 жніўня, суд праходзіў амаль без перапынкаў. Разгляд справы быў прыпынены на некалькі дзён толькі перад спрэчкамі бакоў, якія прайшлі ў панядзелак 9 верасня.
Паводле следзтва, 11 лютага ў стаўюцоўскай сярэдняй школе № 2 вучань 10 класа напаў з нажом на настаўніцу і трох вучняў.
50-гадовая настаўніца гісторыі і грамадазнаўства і вучань 11 класа загінулі, двух аднакласнікаў нападніка шпіталізавалі з раненнямі. 
svaboda.org