З’явілася відэа смерці Вітольда Ашурка. Яго трымалі ў карцары (Асцярожна, на відэа момант смерці!)

Сцвярджаецца, што 21 мая Вітольд Ашурак быў знойдзены без прытомнасці дзяжурным кантралёрам папраўчай калоніі №17.

aszurak210118_ra837.jpg

На відэа відаць, як 50-гадовы палітвязень хістаецца і падае пры спробе схадзіць у туалет. Далей яму перавязваюць галаву. Неўзабаве ён упаў яшчэ раз, распавядае «Наша Ніва».

Для аказання дапамогі мужчыне былі выкліканыя работнікі медыцынскай часткі і хуткай медыцынскай дапамогі. Нягледзячы на праведзеныя медыкамі рэанімацыйныя мерапрыемствы, выратаваць мужчыну не ўдалося.

З-за чаго канкрэтна ён упаў і разбіў галаву — з апублікаванага відэа не зразумела.

Кадры маюць прыкметы мантажу, незразумела, што было да першага падзення і перад другім.

Паводле слоў супрацоўнікаў калоніі, асуджаны, разбіўшы галаву, скаргаў на стан здароўя нібыта не выказваў, нібыта адмовіўся ад дапамогі і шпіталізацыі.

Мяркуючы па надпісе на спіне, Ашурка ўтрымлівалі ў штрафным ізалятары.

Раней праблем са здароўем Ашурак не меў, сцвярджаюць яго сваякі і сябры.

Нагадаем, цела 50-гадовага палітвязня Вітольда Ашурка, пра смерць якога паведамілі ў калоніі Шклова ў пятніцу, аддалі сваякам днём у аўторак. Сяброўка сям’і Вольга Быкоўская расказала, што ў Вітольда «забінтаваная галава ад макаўкі да носа, бачны толькі рот».

Палітвязень з Бярозаўкі Вітольд Ашурак, якому 18 студзеня ў Лідзе на закрытым працэсе прысудзілі да 5 гадоў калоніі агульнага рэжыму, памёр у шклоўскай калоніі. Яму было 50 гадоў. Ашурак быў сябрам Партыі БНФ, каардынатарам Руху «За Свабоду», чалавек быў бясконца адданы Беларусі. Апошнія два тыдні ад Вітольда не было лістоў.

У калоніі ў Шклове «палітычным» нашываюць жоўтыя біркі, пісаў з калоніі Ашурак.

«Палітычных тут не бракуе. Так што сумаваць нагоды няма. Тым больш, што адміністрацыя выдала загад мець жоўты колер бірак на адзенні, і таму палітычных можна адрозніць здалёк», — пісаў палітвязень.

«Што тычыцца мяне, то тэрмін у 5 год я ўспрымаю як адзнаку "выдатна" за тое, што меў гонар падняць паходню паўстання супраць дыктатуры сярод самых лепшых людзей Ліды! Сапраўды, для мяне гэта гонар!» — пісаў Ашурак з калоніі.

Ашурка судзіў суддзя Максім Філатаў за зачыненымі дзвярыма па двух артыкулах: 364 — «Гвалт ў дачыненні да супрацоўніка органаў унутраных спраў» і 342 — «Арганізацыя і падрыхтоўка дзеянняў, якія груба парушаюць грамадскі парадак». Па першым артыкуле суд пастанавіў пакараць актывіста чатырма гадамі калоніі, а па другім — двума гадамі і чатырма месяцамі. Шляхам частковага паглынання атрымалася пяць гадоў.

Ашурак нарадзіўся ў 1970 годзе ў вёсцы Агароднікі ля Бярозаўкі. Як і многія іншыя мясцовыя хлопцы, пасля школы ўладкаваўся на шклозавод «Нёман», дзе працаваў выдзьмувальнікам. Працаваў аж да той пары, пакуль завод трохі трымаўся і там плацілі нейкія заробкі. Калі ж у эканамічным плане прадпрыемству стала зусім кепска, то Вітольд адтуль звольніўся.

Пасля гэтага пачаў зарабляць на жыццё будаўнічымі працамі, у яго была брыгада, разам з якой і ездзіў на розныя аб’екты, даязджалі так нават да Століна. Афіцыйна быў непрацаўладкаваны.

Знакавым годам для светапогляду Ашурка стаў 2010, калі праходзілі прэзідэнцкія выбары.

На працягу 2017-2018 гадоў Вітольд Ашурак разам са сваімі паплечнікамі аднавіў між вёскамі Малое Олажава і Мохавічы мемарыял памяці паўстанцам Каліноўскага.

Вітольд быў жанаты больш за дзесяць гадоў, дзяцей у сям’і не было.

Ашурка ўпершыню затрымалі 9 жніўня, у дзень выбараў. Суд пакараў актывіста 20 суткамі: 15 — за ўдзел у несанкцыянаваным мерапрыемстве і пяць — за непавагу да суда: адмовіўся ўстаць, калі з’явіўся суддзя. Аднак праз пяць дзён яго адпусцілі, як і амаль усіх тагачасных палітвязняў, што адбывалі адміністрацыйнае пакаранне. Тым не менш, крымінальную справу завялі ўжо тады.

16 верасня Ашурка забралі паўторна. Мала таго, што яму заставалася адбыць 15 сутак з мінулага, дык дадалі яшчэ 15 — за ўдзел у мерапрыемствах у Лідзе ў жніўні-верасні. Калі Вітольду заставалася адбыць 2-3 сутак, яго перавялі ў гродзенскае СІЗА па крымінальным артыкуле.