Пасля трохгадовага перапынку гурту Dzieciuki дазволілі выступіць у Мінску

Апошні выступ вядомага беларускага гурта ў сталіцы адбыўся 27 лютага 2016 года. І хоць з таго часу музыкі адыгралі і на ўрачыстым канцэрце ў гонар стагоддзя БНР і фэсце «Наш дзень», Мінгарвыканкам рэгулярна працягваў адмаўляць у праве правесці афіцыйны выступ у горадзе. 

На афіцыйнай старонцы гурта Ўкантакце паведамляецца, што самым «ураджайным» быў 2018 год: «Цяжка зараз падлічыць, але дакладна, не меньш дзесяці разоў, розным арганізатарам, адмаўлялі ў "гастрольке"».
Музыкі таксама падзякавалі Уладзіміру Плавінскаму і Сяргею Будкіну за ўдалую на гэты раз спробу арганізацыі канцэрта, які адбудзецца 28 красавіка ў клубе «RE:PUBLIC».