У Баварыі знойдзеныя каля 30 партрэтаў князёў Радзівілаў
Унікальная калекцыя партрэтаў і прадметаў дэкаратыўна-прыкладнога мастацтва — частка спадчыны князёўны Стэфаніі Радзівіл, дачкі князя Дамініка — апошняга прамога нашчадка нясвіжскай галіны роду па мужчынскай лініі, паведаміла прэс-служба замкавага комплексу «Мір».
Палац Шылінгфюрст
Наступным уладальнікам стаў сын Стэфаніі — Пётр Вітгенштэйн, а затым яго сястра, княгіня Марыя Гогенлоэ-Шылінгсфюрст, жонка канцлера Германіі.
Калекцыя ў ХІХ стагоддзі належала ўладальнікам Мірскага замка, нашчадкам роду Радзівілаў па жаночай лініі ў выніку працяглых навуковых даследаванняў і пошукаў выяўлена спецыялістамі музея «Замкавы комплекс «Мір».
«Пры спрыянні міністэрства культуры ў лістападзе была арганізавана камандзіроўка ў Баварыю, у палац Шылінгсфюрст, уладальнік якога князь Канстанцін Гогенлоэ-Шылінгсфюрст даў згоду на азнаямленне з яго калекцыяй, — кажа аўтар адкрыцця, кандыдат гістарычных навук, дырэктар музея «Замкавы комплекс «Мір» Вольга Папко. — Папярэдняя інфармацыя паказвала на тое, што ў Баварыі нас чакае сапраўднае адкрыццё, але я не магла сабе ўявіць, што яно будзе такога маштабу! Замест чаканых 6 было выяўлена каля 30 партрэтаў князёў Радзівілаў, не ўсе яны выстаўлены ў экспазіцыі гэтага прыватнага музея».
Вольга Папко ў экспазіцыі музея Шылінгсфюрст. На сцяне — не вядомы раней партрэт княгіні Стэфаніі ў дзяцінстве.
Калекцыя змяшчае шмат невядомых раней жывапісных партрэтаў — князя Караля-Станіслава Радзівіла «Пане Каханку», князя Дамініка і яго маці княгіні Сафіі. Рэдкая знаходка — некалькі партрэтаў самой князёўны Стэфаніі.
Да гэтага часу гісторыкі і мастацтвазнаўцы не ведалі, як яна выглядала. Даследчыкам яшчэ трэба высветліць, у якіх палацах і замках роду князёў Радзівілаў знаходзіліся самыя старыя партрэты і прадметы з гэтай калекцыі.
У дадзены момант кіраўніцтва музея вядзе перамовы з князем Гогенлоэ-Шылінгсфюрст аб магчымасці яго візіту ў Мірскі замак.
Яму прапанавана арганізаваць выставу калекцыі з Германіі ў Міры. Вывучэнне знаходкі дазволіць ліквідаваць многія белыя плямы ў гісторыі лёсаў уладальнікаў Мірскага замка.
Адкрыццё калекцыі — адна з самых значных падзей у справе даследавання гісторыі роду князёў Радзівілаў і князёў Вітгенштэйнаў на працягу некалькіх апошніх дзесяцігоддзяў.
Вольга Папко займаецца вывучэннем гісторыі князёў Радзівілаў каля 10 гадоў. Раней яна знайшла і апублікавала альбом малюнкаў польскага мастака Юльяна Фалата са сцэнамі з радзівілаўскіх паляванняў.
Здымкі прадастаўленыя прэс-службай музея "Замкавы комплекс "Мір"