У Мінску адкрылася выстава акварэлі Івана Петручыка (фота)
Вечарам 25 студзеня ў Мінскай гарадской бібліятэцы №7 імя Якуба Коласа адкрылася першая персанальная выстава маладога беларускага мастака Івана Петручыка “Акварэллю пра ўбачанае”.
Фрагмент экспазіцыі
Гарбаты масток
Возера на Каўказе
Туман над Мухаўцом
Замежны краявід
Агароджаны туман
Без назвы
Патануўшае неба
Туман над ракою
Мастак з маці
Арганізатарамі выставы выступілі Мінская гарадская арганізацыя Беларускага таварыства інвалідаў і сталічны клуб-студыя жывапісу “Палітра радасці”.
Іван Петручык нарадзіўся ў 1991 годзе на Украіне. Школьнікам пачаў займацца спортам, у 16 гадоў стаў майстрам спорту па лыжах. Чатырохразовы чэмпіён Беларусі ў гэтым паралімпійскім відзе спорту. Удзельнік міжнародных спаборніцтваў. З 16 гадоў піша абразы. У 2014 годзе закончыў Белдзяржуніверсітэт па спецыяльнасці “дызайн” і пачаў працаваць у жанры акварэлі. Выкладае ў нядзельнай школе. З мінулага году — сябра Беларускага саюзу дызайнераў.
Мастака вітае старшыня Мінскай гарадской арганізацыі Беларускага таварыства інвалідаў Людміла Калмыкова
Як адзначае мастацтвазнаўца Ларыса Фінкельштэйн, рэалістычныя акварэлі Івана Петручыка — своеасаблівы погляд на свет: калі пільны, які выхоплівае дэталь, твары, кветку, калі нібыта з птушынага палёту лунаючы над лесам, сенажацямі, рэчкамі, калі застылы ад захаплення погляд на храм, старадаўнюю архітэктуру, гарадскую вулачку, вясковую цэркаўку. Усе набывае святло ў аўтарскім бачанні, пачуцці і перажыванні пры гэтым захоўваюць дакладнасць. У акварэлях мастака — ягоная душа, пачуцці, шчырасць, што перакладзеныя на мову колеру, святла і паветра. У ягоным святло-паветраным асяродку камфортна гледачу.
Паводле словаў кіраўніцы клубу-студыі “Палітра радасці” Ганны Гадзіравай, акварэлі Івана Петручыка вылучаюцца прыгажосцю, далікатнасцю, душэўнасцю і велічнасцю. І вельмі прыемна, што працы мастака былі адзначаны на даволі высокім узроўні. Так, у бягучым годзе Іван Петручык прадстаўляў Беларусь ў Расіі, у маскоўскім “Цэнтральным доме мастака” Міжнароднай канфедэрацыі саюзаў мастакоў у праекце “Мір без межаў”, дзе быў адзначаны двума медалямі: залатым — журы і бронзавым — гледачоў.
Мастака павіталі ягоныя калегі і сябры. У сваю чаргу Іван Петручык выказаў шчырую ўдзячнасць сваім бацькам і ўсім тым, хто дапамагае яму рэалізавацца ў жыцці.