Пасол Беларусі ў Іспаніі заявіў, што ў Беларусі склалася непрымальная сітуацыя

Амбасадар Беларусі ў Іспаніі Павел Пуставой звярнуўся да суродзічаў з заклікам «у спакойных і мірных абставінах абмеркаваць усе праблемы, якія хвалююць людзей», паведамляе «Радыё Свабода».

Адносячыся да падзеяў у Беларусі, Пуставой адзначыў, што «такая сітуацыя непрымальная ў еўрапейскай дзяржаве ХХІ стагоддзя».
Паводле амбасадара, каб мірна вырашыць гэтую сітуацыю, трэба, па-першае, правесці перападлік вынікаў галасавання.
Па-другое, дадаў ён, неабходна правесці «адкрытыя судовыя пасяджэнні» ў адносінах да тых, хто: збіваў мірных дэманстрантаў; правакаваў да жорсткасці сілавікоў, першымі нападаючы камянямі і арматурай; затрымліваў без падставы і здзекаваўся над затрыманымі; здзяйсняў аўтамабільныя наезды на прадстаўнікоў міліцыі; пагражаў блізкім і сваякам удзельнікаў падзей.