Павел Севярынец: Вылучэнне Мікалая Статкевіча — адзіны варыянт

Нельга дапускаць легітымізацыі рэжыму Лукашэнкі на фоне перамоваў па Украіне.



Пра гэта сайту charter97.org заявіў сустаршыня аргкамітэта па стварэнні партыі «Беларуская хрысціянская дэмакратыя», былы палітвязень Павел Севярынец.
«Неаднаразова даводзілася на кансультацыях з дэмакратычнымі лідэрамі казаць, што вылучэнне Мікалая Статкевіча ў якасці адзінага кандыдата ў прэзідэнты на выбарах 2015 у сённяшняй сітуацыі было б адзіным варыянтам, — сказаў палітык.  — Гэты крок ясна пакажа, што сумленных выбараў у нас няма, але ёсць палітвязні. Удзел Мікалая Статкевіча ў кампаніі з'яўляецца, безумоўна, моцным маральным крокам і абавязкам ўсіх дэмакратаў».
Лідэр БХД заявіў, што ўдзельнічаць у псеўдавыбарах нельга.
«Выбараў наогул няма, — сказаў Павел Севярынец. — Гэта спектакль Ярмошынай. Удзел дэмакратычных кандыдатаў у псеўдавыбарах грае на руку рэжыму. 
Калі ўлады вызваляць палітвязняў, але не зарэгіструюць Мікалая Статкевіча, удзельнічаць у выбарах таксама нельга. Змагаючыся за рэгістрацыю Статкевіча, неабходна праводзіць сваю кампанію па ўмацаванні незалежнасці краіны. Назіранне за выбарамі неабходна сфакусаваць на яўцы выбаршчыкаў і парушэннях. Нельга дапускаць легітымізацыі рэжыму Лукашэнкі на фоне перамоваў па Украіне, якія праходзяць у Мінску».