Статкевіч заклікаў прэм'ер-міністра Літвы адмовіцца ад сустрэч з беларускім кіраўніцтвам
Экс-кандыдат у прэзідэнты Беларусі Мікалай Статкевіч, які знаходзіцца ў зняволенні, заклікаў прэм'ер-міністра Літвы Альгірдаса Буткявічуса адмовіцца ад сустрэч з беларускім кіраўніцтвам.
Тэкст ліста размешчаны на сайце statkevich.org.
Нагодай для звароту стала сустрэча Буткявічуса з прэм'ер-міністрам Беларусі Міхаілам Мясніковічам у сярэдзіне красавіка ў Клайпедзе, а таксама «шырокае абмеркаванне магчымасці
запрашэння вышэйшых службовых асоб нашай краіны на саміт Усходняга партнёрства ў Вільнюсе».
«Калі Літва змагалася за выхад з савецкай імперыі, многія людзі ў Беларусі былі салідарныя з вашай барацьбой, — гаворыцца ў лісце. — Цяпер ужо беларускі народ мае
патрэбу ў салідарнасці ў сваёй барацьбе за свабоду, незалежнасць і нават за захаванне нацыянальнай ідэнтычнасці. Аўтарытэтныя міжнародныя арганізацыі заяўляюць пра грубае парушэнне правоў чалавека ў
нашай краіне, пра татальныя фальсіфікацыі выбараў, пра дачыненне ўлад да выкраданняў і забойстваў апазіцыйных лідараў. Беларускія палітзняволеныя зведваюць націск і нават катаванні з мэтай прымусіць
іх папрасіць памілавання ў нелегітымнага прэзідэнта».
Статкевіч адзначае: «Тыя, хто змагаецца за свабоду нашай краіны, разглядаюць любыя прамыя кантакты кіраўніцтва дэмакратычных краін з верхаводамі беларускага рэжыму як здраду ідэалаў
дэмакратыі і спробу легітымізацыі дыктатуры».
Ён заклікаў Буткявічуса адмовіцца ад любых сустрэч з беларускім кіраўніцтвам датуль, пакуль у Беларусі не будуць вызвалены ўсе палітзняволеныя.
Нагадаем, пра магчымасць візіту Буткявічуса ў Беларусь абвясціў Мясніковіч пасля візіту ў Клайпеду. Літоўскі бок пасля абверг гэту інфармацыю.
Таццяна Каравянкова, БелаПАН