БагатаДата 10–16 кастрычніка

70 гадоў таму быў заснаваны завод «Гарызонт». А таксама мы адзначаем багата дзён народзінаў. Каго? Чытайце ў нашым традыцыйным аглядзе.

10 кастрычніка

Еўрапейскі дзень барацьбы супраць смяротнага пакарання і Сусветны дзень псіхічнага здароўя.

1940. У Мінску нарадзіўся пісьменнік і выдатны журналіст Кастусь Тарасаў, аўтар папулярных гістарычных кніг. Напрыклад, «Пагоня на Грунвальд», «Памяць пра легенды», «Апошняе каханне князя Міндоўга».

11 кастрычніка

Дзень работнікаў культуры і Міжнародны дзень дзяўчынак.

12 кастрычніка



1980. У вёсцы Вялікія Арлы Столінскага раёна на Брэстчыне нарадзілася штурхальніца ядра Надзея Астапчук. Чэмпіёнка свету і Еўропы. Заваявала бронзавы медаль на Алімпійскіх гульнях–2008, але беларуска была пазбаўлена яго, бо ў яе аналізах былі выяўлены забароненыя рэчывы. Гісторыя паўтарылася на Алімпіядзе–2012, дзе Астапчук паказала найлепшы вынік.

13 кастрычніка

Міжнародны дзень па змяншэнні небяспекі бедстваў.

1950. Заснаваны завод тэлевізараў «Гарызонт».

14 кастрычніка



Сусветныя дні маці і стандартызацыі.

1980. У вёсцы Засовы Лагойскага раёна на Міншчыне нарадзілася лёгкаатлетка Святлана Усовіч. Медалістка чэмпіянатаў свету і Еўропы (бег).

15 кастрычніка

Сусветныя дні сельскіх жанчын і мыцця рук. А таксама Дзень працаўнікоў фармацэўтычнай і мікрабіялагічнай прамысловасці.

1950. У Мінску нарадзіўся музыка Анатоль Кашапараў. Саліст славутага гурта «Песняры». Сярод іншага спяваў «Волагду», «Я не магу іначай», «Добры вечар, дзеўчыначка».

16 кастрычніка

Сусветныя дні харчавання і анестэзіёлага.

1935. У Мінску нарадзіўся беларуска-французскі жывапісец Барыс Забораў. Ствараў касцюмы да спектакляў тэатра «Камедзі Франсэз» у Парыжы, дзе ён жыве.

1940. У горадзе Южа Іванаўскай вобласці ў Расіі нарадзіўся скульптар Алесь Шатэрнік. Яго творы захоўваюцца ў фондах Нацыянальнага мастацкага музея Беларусі, Траццякоўскай галерэі ў Маскве, у Белым Доме ў Вашынгтоне.

Шмат разоў рэстаўраваў пашкоджаную лаву Клінтана ў Курапатах. Менавіта ён зрабіў помную дошку ў гонар абвяшчэння БНР, якую не дазволілі ўсталяваць у Мінску ўлады.