Бацька Паўла Грыба будзе дапамагаць вязням

Бацька ўкраінца Паўла Грыба, арыштаванага ФСБ на тэрыторыі Беларусі, выйграў конкурс на пасаду ў міністэрстве. У выпадку прызначэння на пасаду Ігар Грыб будзе займацца дапамогай асобам, пазбаўленым свабоды.

Конкурс на пасаду кіраўніка аддзела дапамогі асобам, пазбаўленым свабоды, Міністэрства часова акупаваных тэрыторый выйграў Ігар Грыб, бацька незаконна ўтрыманага ў Расіі ўкраінца Паўла Грыба. Пра гэта на сваёй старонцы ў Facebook напісала дэпутат Ірына Герашчанка, паведамляе liga.net.
Яна адзначыла, што Грыб «шчыра займаецца пытаннямі дапамогі сем'ям закладнікаў і палітвязняў».
Таксама Герашчанка паведаміла, што ва ўрадзе адзін з віцэ-прэм'ераў будзе курыраваць пытанні дапамогі сем'ям закладнікаў і палітвязняў, а таксама каардынаваць працу іншых міністэрстваў у гэтай сферы.
Раней Ігар Грыб працаваў у Дзяржпагранслужбы.
Нагадаем, Павел Грыб быў выкрадзены расійскімі спецслужбамі ў Гомелі 24 жніўня 2017 года. У Беларусь ён прыехаў па просьбе дзяўчыны – расійскай школьніцы Таццяны, з якой ён перапісваўся ў сацыяльных сетках. ФСБ Расіі завяло супраць хлопца крымінальную справу па артыкуле «Тэрарыстычны акт». Паводле заяваў следства, Павел з дзяўчынай планаваў здзейсніць выбух на выпускной лінейцы ў адной са школаў Сочы. Блізкія называюць абвінавачанне абсурдным, паколькі ў перапісцы хлопца няма ніякіх згадак пра тэракт.
Беларускія праваахоўнікі так і не растлумачылі сям’і Паўла Грыба, якім чынам расійскія спецслужбы змаглі выкрасці ўкраінскага грамадзяніна на беларускай тэрыторыі.