Больш за 4 тысячы чэхаў падпісаліся за вызваленне Марыі Калеснікавай
Петыцыя за вызваленне Марыі Калеснікавай была сёння перададзеная ў беларускую амбасаду ў Празе.
Удзельніцы перадачы петыцыі ў беларускую амбасаду за вызваленне Марыі Калеснікавай, Прага, 11 лістапада 2021. Фота: «Радыё Свабода»
Ініцыятарам стала чэшская філія праваабарончай арганізацыі «Amnesty International». Паводле кіраўніцы арганізацыі Лінды Сокачавай, свае подпісы пад петыцыяй паставілі больш за чатыры тысячы чэхаў. Сярод тых, хто прыйшоў перадаць петыцыю, была і сястра Марыі Калеснікавай Таццяна Хоміч.
Амбасада не адчыніла сваю брамку, каб прыняць дэлегацыю. Загадзя параілі пакінуць карэспандэнцыю ў паштовай скрыні. Такім самым чынам апарат амбасады калісьці сустрэў і чэшскага прэзідэнта Вацлава Гавела, які незадоўга да сваёй смерці прынёс допіс з патрабаваннем выпусціць беларускіх палітвязняў.
Напярэдадні Таццяна Хоміч атрымала за сваю сястру прэмію «За свабоду, дэмакратыю і правы чалавека». Марыю Калеснікаву, як і Франака Вячорку, такім чынам уганараваў чэшскі Інстытут вывучэння таталітарных рэжымаў.
Спадарыня Хоміч была ўчора адной з удзельніц прэсавай канфэрэнцыі, пляцоўку для якой прадаставіў Нацыянальны тэатр у Празе. З апошніх навін пра сястру яна паведаміла, што Марыя пасля прысуду застаецца ў мінскай турме на Валадарскага. Яе змясцілі ў адзіночную камеру. Яна не страчвае аптымізму, чытае, мае магчымасць глядзець тэлевізар (дзяржаўныя каналы). Асноўны час прысвячае падрыхтоўцы абскарджання прысуду, якое мае намер падаць у Вярхоўны суд.