Ізраіль пачынае будаваць сцяну на мяжы з сектарам Газа

Ізраіль пачаў узвядзенне сталёвай «разумнай сцены» на мяжы з сектарам Газа. Яе даўжыня — больш за 65 км, вышыня — 6 м. Яна стане завяршальнай часткай комплексу, у які ўваходзяць падземныя загароды і трохслаёвы марскі бар'ер.

Інжынерныя часткі Арміі абароны Ізраіля прыступілі да будаўніцтва надземнага «разумнага плота» на мяжы з сектарам Газа, паведамляе The Jerusalem Post са спасылкай на заяву прэм'ер-міністра краіны Біньяміна Нетаньяху.
«Бар'ер унікальны і цалкам падыходзіць для стрымлівання пагроз з боку сектара Газа, ён у максімальна магчымай меры забяспечыць прадухіленне пранікнення на ізраільскую тэрыторыю», — цытуе газета кіраўніка вайсковага ўпраўлення па будаўніцтве агародж, брыгаднага генерала Эрана Афіра.
У цяперашні час сектар Газа аддзелены ад Ізраіля плотам з камерамі назірання, вартавымі вышкамі і калючым дротам. У верасні 2016 года ізраільскія ўлады прыступілі да будаўніцтва падземнай загароды ўздоўж мяжы з Газай, каб не дапусціць будаўніцтва тунэляў з таго боку. Пасля завяршэння будаўніцтва маналітныя падземныя загароды працягнуцца ўздоўж усёй амаль 70-кіламетровай мяжы, іх глыбіня залягання складае некалькі дзясяткаў метраў. Узвядзенне падземных загарод яшчэ не завершана.
Наземны бар'ер ўзводзіцца як завяршальная частка комплексу па ахове мяжы з Газай. Даўжыня новай смарт-сцены складзе 65 км. З аднаго боку сцяна злучыцца з нядаўна пабудаванай марской загародай побач з пляжам Зікім, з другога — c КПП «Керэм Шалом».
Сцяна будзе выраблена з ацынкаванай сталі, вага ўсёй канструкцыі дасягне 20 тыс. тон, яе вышыня складзе 6 м.
«Разумная сцяна» стане працягам падземнага бар'ера, які абсталяваны сістэмай сучасных датчыкаў і прылад маніторынгу для выяўлення тунэляў. У Мінабароны Ізраіля ўдакладнілі, што ўзвядзенне падземнай загароды «будзе працягвацца паралельна з працамі па будаўніцтве сцяны».
У пачатку года Ізраіль абвясціў, што будаўніцтва марскога бар'ера, прызначанага для прадухілення пранікнення ХАМАС з мора, набліжаецца да завяршэння. 200-метровы марскі бар'ер складаецца з трох слаёў, адзін з якіх размешчаны ніжэй за ўзровень мора. Ён забяспечаны сейсмічнымі дэтэктарамі і іншымі інструментамі назірання і выяўлення.
rbc.ru