Канада выдаткуе 2,25 млн долараў на падтрымку беларускай грамадзянскай супольнасці

Канада выдаткуе 2,25 млн канадскіх долараў (1,76 млн долараў ЗША) на падтрымку арганізацый беларускай грамадзянскай супольнасці, што садзейнічаюць прасоўванню дэмакратыі.

Пра гэта паведаміў міністр замежных спраў краіны Марк Гарно, які падтрымаў ініцыятыву экс-кандыдаткі ў прэзідэнты Святланы Ціханоўскай абвясціць 7 лютага Міжнародным днём салідарнасці з Беларуссю, перадае Радыё Свабода са спасылкай на БелаПАН.

МЗС Канады адзначае, што гэтыя сродкі — дапаўненне да 600 тыс долараў (469 тыс. долараў ЗША), аб выдзяленні якіх для падтрымкі беларускіх жанчын і незалежных СМІ было абвешчана раней.

На думку канадскіх уладаў, гэта дапаможа ўмацаваць разнастайнасць, устойлівасць і эфектыўнасць беларускай грамадзянскай супольнасці, якая адстойвае свае правы і грамадзянскія свабоды.

Знешнепалітычнае ведамства падкрэслівае, што Канада працягне працу са сваімі міжнароднымі партнёрамі, каб галасы людзей у Беларусі былі пачутыя, а вінаватыя ў падрыве дэмакратыі і парушэнні правоў чалавека — прыцягнутыя да адказнасці.

«Канада з самага пачатку крызісу актыўна ўдзельнічала ў падтрымцы дэмакратычных памкненняў народа Беларусі і выступала за мірнае ўрэгуляванае палітычнай сітуацыі. Мы працягнем выступаць за сапраўдны і ўсебаковы нацыянальны дыялог, каб будучыня Беларусі адлюстроўвала волю яе грамадзян», — заявіў Марк Гарно.

Раней Канада ўвяла санкцыі ў дачыненні да 55 асобаў, вінаватых, на яе думку, у парушэнні правоў чалавека ў Беларусі.