Латвія прыняла закон аб кампенсацыях ахвярам Халакосту

Згодна з новым законам, габрэйскай абшчыне Латвіі з 2023 года на працягу дзесяці гадоў пералічаць 40 млн еўра, штогод па 4 млн еўра.

Парламент Латвіі — Сейм — прыняў закон аб кампенсацыях ахвярам Халакоста. Тым самым Рыга мае намер выправіць "гістарычныя несправядлівыя наступствы", якія ўзніклі ў выніку "Халакосту і дзейнасці пры савецкай уладзе", падкрэсліваецца ў заяве Сейма, апублікаванай у чацвер, 10 лютага. У падтрымку новага закону прагаласавалі 64 дэпутаты, яшчэ 21 быў супраць. Усяго ў латвійскім парламенце налічваецца 100 месцаў.
Згодна з дакументам, з 2023 года габрэйскай абшчыне Латвіі пералічаць на працягу дзесяці гадоў 40 млн еўра, гэта значыць штогод па 4 млн еўра. У сваю чаргу тым, хто перажыў Халакост, будзе аказана сацыяльная і матэрыяльная падтрымка са сродкаў фонду. Акрамя таго, на гэтыя грошы плануецца фінансаваць габрэйскія школы, будынкі і культурныя праекты, каб умацаваць габрэйскую абшчыну Латвіі.
У нататках да закона падкрэсліваецца, што латвійская дзяржава не нясе адказнасці за адабранне габрэйскай уласнасці і знішчэнне габрэяў у краіне нацыстамі падчас Другой сусветнай вайны. Аднак "этычна і справядліва", каб дзяржава, якая атрымала незалежнасць у 1991 годзе, кампенсавала габрэйскай абшчыне панесеныя ёю маёмасныя страты.
Да Другой сусветнай вайны ў Латвіі жыло каля 95 тысяч габрэяў. Падчас нямецкай акупацыі ў 1941-1944 гадах больш за 70 тысяч з іх былі забітыя. Цяпер габрэйская абшчына Латвіі налічвае каля 9500 чалавек.
dw.com