Латвія ўзмацняе пакаранне за незаконны пераход мяжы. За гэта можа быць да 4 гадоў пазбаўлення волі

Урад Латвіі падтрымаў папраўкі да закону, паводле якіх незаконнае перасячэнне дзяржаўнай мяжы прызнаецца цяжкім злачынствам, піша Свабода. Пакаранне паводле гэтага артыкула павялічыцца з двух да чатырох гадоў пазбаўлення волі.

Міністэрства ўнутраных спраў Латвіі, якое ініцыявала папраўкі, падкрэслівае, што пакаранне трэба зрабіць больш жорсткім у сувязі з ростам парушэнняў на мяжы з Беларуссю ў апошнія тыдні. Ведамства таксама прапануе паскорыць будаўніцтва інфраструктуры на мяжы з Беларуссю: мяжу прапануецца «дапоўніць» будаўніцтвам дарог, мастоў і агароджы з калючага дроту.
Улады Латвіі 10 жніўня абвясцілі рэжым надзвычайнай сітуацыі на мяжы з Беларуссю ў сувязі з наплывам мігрантаў. Гэты дакумент дазваляе памежнікам выкарыстоўваць фізічную сілу і спецыяльныя сродкі, каб вяртаць у Беларусь людзей, якія незаконна перайшлі мяжу. Памежнікам будуць дапамагаць вайскоўцы і паліцыя.
З 10 жніўня латвійскія сілавікі не прапусцілі праз мяжу 417 чалавек.
Да гэтага з павелічэннем колькасці незаконных пераходаў мяжы сутыкнулася Літва. З пачатку году там затрымалі больш за чатыры тысячы чалавек. Літоўскія ўлады абвінавачваюць улады Беларусі ў тым, што тыя спрыяюць нелегальнаму перасячэнню мяжы.