Раскомнагляд паспрабаваў заблакаваць localhost

Роскомнагляд паспрабаваў унесці ў рэестр забароненых сайтаў IP-адрас 127.0.0.1, паведамляе Медуза са спасылкай на Раскомсвабоду.

Гэты IP-адрас носіць назву localhost і ўжываецца для звароту кампутара да самога сябе незалежна ад наяўнасці падлучэння да інтэрнэту. Унясенне localhost у спіс сайтаў азначае, што Раскомнагляд вырашыў абмежаваць правайдэрам, якія выконваюць рашэнне аб блакаваннях, доступ да іх уласных кампутараў.
IP-адрас 127.0.0.1, па дадзеных Раскомсвабоды, з'явіўся ў рэестры ў сувязі з блакаваннем сайта karaoke-besplatno.ru. У судовым рашэнні аб блакаванні, адзначае выданне, згадваўся толькі адрас сайта.
Памылка, паведамляе Роскомсвабода, была хутка выпраўлена. IP-адрас 127.0.0.1, унесены ў рэестр 10 снежня, на наступны дзень быў з яго выключаны.
Адсюль вынікае, што ўнясенне IP localhost у рэестр забароненых сайтаў ініцыятыва саміх супрацоўнікаў Роскомнагляда, якія адказваюць за апрацоўку судовых рашэнняў.