«Купляй амерыканскае, наймай амерыканцаў»

Як паведамляе прэс-служба Белага дома, дакумент закліканы абараніць амерыканскі рынак працы ад замежнай працоўнай сілы і стымуляваць закупкі амерыканскіх тавараў.

Прэзідэнт ЗША Дональд Трамп 18 красавіка падпісаў указ, вядомы як «Купляй амерыканскае, наймай амерыканцаў» (Buy American and Hire American). Ён прывядзе да змены візавай палітыкі, умоў правядзення дзяржаўных закупак і гандлёвых пагадненняў.
Чакаецца, што ўказ будзе спрыяць павелічэнню долі амерыканскіх тавараў пры афармленні дзяржзакупак урадавымі ведамствамі. Пры гэтым іх кіраўніцтва атрымлівае магчымасць перагледзець гандлёвыя пагадненні з іншымі краінамі, якія прадугледжваюць набыццё занадта вялікіх аб'ёмаў замежнай прадукцыі. Дакумент таксама дазваляе амерыканскім кампаніям прадаваць тавары ўрадаў гандлёвых партнёраў ЗША на тых жа ўмовах, што і замежныя кампаніі ў ЗША.
Трамп, які раней выступіў на прадпрыемстве Snap-On Tools па вытворчасці прафесійных інструментаў у штаце Вісконсін, неаднаразова заяўляў пра неабходнасць больш жорсткага падыходу пры найме некаторых катэгорый работнікаў у ЗША. Па словах кіраўніка дзяржавы, з-за недасканаласці заканадаўства пакутуюць амерыканскія кампаніі і іх работнікі, што негатыўна ўплывае на эканоміку краіны.
Указ таксама прывядзе да змены правілаў выдачы працоўных віз H-1B, прызначаных для найму высокакваліфікаванай замежнай працоўнай сілы. Амерыканскія кампаніі заяўляюць, што выкарыстоўваюць H-1B для найму самых таленавітых супрацоўнікаў. Аднак большасць віз H-1B паступае аўтсорсінгавым фірмам, якія, на думку назіральнікаў, выдаюць іх адносна нізкакваліфікаваным суіскальнікам у сферы інфармацыйных тэхналогій. Акрамя таго, штогод 65 тыс. такіх віз разыгрываецца з дапамогай латарэі.
Праграма будзе перагледжана урадам у сувязі з тым, што кампаніі эканомяць на зарплаце і аддаюць перавагу некваліфікаваным замежнікам, а не амерыканцам. Профільныя ведамствы павінны будуць прадаставіць рэкамендацыі па неабходных зменах у іміграцыйнай палітыцы для найму сапраўды таленавітых, кваліфікаваных і высокааплатных работнікаў.
Падпісаны ўказ азначае, што Трамп выконвае свае перадвыбарчыя абяцанні па рэфармаванні іміграцыйнай сістэмы і падтрыманні айчынных вытворцаў.
Паводле naviny.by