У Кітаі пасля апоўзня знікла больш за 140 чалавек

У правінцыі Січуань у цэнтральнай частцы краіны амаль паўтары сотні чалавек апынулася пад заваламі. Пакуль уратавана толькі трое.

Спачатку размова ішла пра 40 чалавек, але лічба, нажаль, няўмольна павялічваецца. Паводле агенцтва Reuters апоўзень знішчыў 46 дамоў у вёсцы Ксінмо, заблакаваў двухкіламетровы адрэзак ракі і кавалак дарогі, працягласцю 1.6 кіламетра.
Уратаваць пакуль удалося толькі пару разам з іх двухмесячным дзіцём, яны апынуліся ў шпіталі. Паліцыя перакрыла ўсе дарогі ў рэгіёне для цывільных аўто, ездзіць можа толькі спец-транспарт. Ратавальнікі працягваюць сваю працу.
Нагадаем, што раней у Бангладэшы праз наступствы моцных дажджоў загінула каля паў сотні чалавек.