На Кубу будзе пастаўляцца беларуская малочная прадукцыя

Куба і Беларусь значна павялічылі ўзаемны тавараабарот, заявіў надзвычайны і паўнамоцны пасол Кубы Альфрэда Н'евес Партуонда 30 мая падчас рабочага візіту ў Магілёў.



Надзвычайны і паўнамоцны пасол Кубы Альфрэда Н'евес Партуонда. Фота telegraf.by

Так, паводле яго слоў, у 2012 годзе тавараабарот склаў 110 млн. долараў ЗША. У 2011 годзе ён складаў 50 млн. долараў, а яшчэ годам раней — 20–25 млн.

"Ад вас Куба імпартуе шмат трактароў. Толькі што атрымалі прыкладна 200 трактароў. Мы купілі ў вас больш як чатыры гады таму аўтобусы, але для ўсіх аўтобусаў патрэбны запасныя часткі. Цяпер купляем запасныя часткі для аўтобусаў. Таксама купілі некалькі аўтамабіляў "БелАЗ", — паведаміў пасол. Паводле яго сцвярджэння, ужо падпісаны дагавор з Міністэрствам сельскай гаспадаркі і харчавання аб пастаўцы на Кубу малочнай прадукцыі з Беларусі.
 

Альфрэда Н'евес Партуонда адзначыў, што Беларусь купляе ў Кубы цукар, ром. Астраўная дзяржава хацела б павялічыць пастаўкі ў Беларусь трапічнай садавіны, напояў, сокаў, прадукцыі для медыцынскіх патрэб.

Кубінская дэлегацыя наведала шэраг магілёўскіх прадпрыемстваў, у прыватнасці ААТ "Магатэкс". "Вы — краіна, якая развівае тэкстыльную індустрыю. Хочам усё паглядзець, атрымаць інфармацыю і перадаць яе на Кубу. Таму хочам пагутарыць з кіраўніцтвам прадпрыемства", — сказаў пасол журналістам.

У свой першы візіт у Магілёў у верасні 2012 года Альфрэда Н'евес Партуонда і прадстаўнік Міністэрства прамысловасці і чорнай металургіі Кубы Мігель Анхель Брочэ наведалі прадпрыемства "Магілёўліфтмаш". Зараз, паводле слоў пасла, прапрацоўваецца магчымасць стварэння сумеснай кубінска-беларускай вытворчасці па зборцы на востраве магілёўскіх ліфтаў.

Уладзімір Лапцэвіч, БелаПАН