65-гадовы пенсіянер, якога асудзілі на 15 сутак, не выйшаў на волю

Пенсіянер Адам Шпакоўскі, на якога паскардзіліся суседзі за тое, што ён «дастаў усіх беларускай мовай», не выйшаў на волю пасля 15 сутак арышту. На мужчыну склалі дадатковы пратакол і далі яшчэ 12 сутак, паведамляе телеграм-канал "Вясна назірае".

21 красавіка да 65-гадовага мінчука прыйшлі з ператрусам, які працягваўся 6 гадзін. Прэс-служба МУС назвала пенсіянера адным з двух адміністратараў раённага чата для жыхароў Уручча. У яго кватэры знайшлі "незарэгістраваную сімволіку, Улёткі і літаратуру з заклікамі да пратэстнай дзейнасці", якія ён нібыта вырабляў і распаўсюджваў сярод суседзяў. Таксама ў мужчыны канфіскавалі буйныя сумы грошай — каля 65 тысяч еўра і больш за 87 тысяч долараў ЗША.
Як стала вядома праваабаронцам, на пенсіянера паскардзіліся суседзі за тое, што ён «даставаў усіх беларускай мовай» (Адам Шпакоўскі ўвесь час размаўляе па-беларуску). Пасля гэтага затрыманага павезьлі на Акрэсьціна. Суд пакараў мужчыну арыштам на 15 сутак.
12 мая стала вядома, што на пенсіянера склалі дадатковы пратакол па арт. 19.10 Каап (Прапаганда або публічнае дэманстраванне, выраб, распаўсюджванне нацысцкай сімволікі або атрыбутыкі). Пенсіянера асудзілі яшчэ на 12 сутак, ён правядзе амаль цэлы месяц не на волі.
Паводле news.tut.by