Актывісты Legalize Belarus збіраюцца судзіцца з Мінінфармацыі
Актывісты грамадскай кампаніі Legalize Belarus атрымалі з Міністэрства інфармацыі скрыншоты матэрыялаў вэбсайту legalize.by, якія паслужылі падставай для блакавання рэсурсу за «прапаганду спажывання марыхуаны».
На скрыншотах — 10 здымкаў з сайту кампаніі, большасць з якіх зробленая падчас мерапрыемстваў і акцыяў, што ладзілі актывісты.
Агульны фотаздымак удзельнікаў сустрэчы з Legalize Belarus у Гародні.
Фотаздымак з стыкерамі кампаніі і паштоўкамі, якія дасылаліся асуджаным па артыкуле 328 падчас «Талакі салідарнасьці» ў Мінску.
Фотаздымак Пятра Маркелава, зроблены для фотапраекту Legalize Belarus «Спыніць вайну з наркотыкамі!».
Фотаздымак удзельнікаў сустрэчы з Legalize Belarus у Віцебску.
Фотаздымкі «Радыё Свабода» з пікету за дэкрыміналізацыю марыхуаны.
Фотаздымкі «Радыё Свабода» з пікету за дэкрыміналізацыю марыхуаны.
Фотаздымак з «Канаплянай каляды» у Менску.
Фотаздымак Пятра Маркелава, зроблены падчас суду за арганізацыю «Канаплянай каляды».
Скрыншот вокладкі відэа «Несанкцыянаваныя каляды» ад «Белсату».
Фотаздымак удзельнікаў сустрэчы з Legalize Belarus у Берасьці.
Актывісты кампаніі ўпэўненыя, што гэтыя здымкі нельга лічыць «прапагандай спажывання марыхуаны і збіраюцца падаваць у суд на Міністэрства інфармацыі.
«Гэтыя здымкі неўтральна адлюстроўваюць нашую дзейнасць. Ніякіх дадатковых каментароў ад Міністэрства інфармацыі пра тое, якім чынам гэтыя фота прапагандуюць спажыванне марыхуаны, мы не атрымлівалі. Наяўнасць у кадры выявы ліста канопляў ці лагатыпу нашай кампаніі не можа лічыцца прапагандай. Нашая мэта — дэкрыміналізацыя, мы не заахвочваем ужываць марыхуану», — кажа Стас Шашок, юрыст Legalize Belarus.
Вэбсайт асветніцка-адвакацыйнай кампаніі Legalize Belarus legalize.by заблакаваны 17 траўня 2018 рашэннем Міністэрства інфармацыі на падставе апавяшчэння з Міністэрства ўнутраных справаў. Разам з ім аказаліся недаступнымі каля 300 вэбсайтаў, што знаходзяцца на серверы з IP-адрасам 139.162.166.31.
Паводле прэс-рэлізу