Аляксей Мінчонак стаў новым дырэктарам Сакратарыяту БНП

Новым дырэктарам Сакратарыяту Беларускай нацыянальнай платформы прызначаны Аляксей Мінчонак, які да гэтага працаваў на тэлеканале «Белсат».

«У Беларускую нацыянальную платформу мяне прывяла вялікая цікаваць да сектару НДА. Упэўнены, што аб’яднаныя арганізацыі грамадзянскай супольнасці могуць зрабіць адчувальны ўнёсак у развіццё Беларусі і яе збліжэння да Еўрапейскага саюзу,” – лічыць Аляксей. “Сваімі першаснымі задачамі на пазіцыі дырэктара Сакратарыяту БНП я бачу актывізацыю працы Працоўных групаў і супрацы сяброўскіх арганізацыяў БНП, пашырэнне інфармавання пра дзейнасць БНП, ФГС і праграмы Усходняга партнёрства. Думаю, мой медыйны бэкграўнд дапаможа эфектыўна вырашыць гэтыя задачы.
Варта больш шчыльна супрацоўнічаць з нашымі міжнароднымі партнёрамі: паглыбляць узаемадзеянне з наяўнымі і ўсталёўваць новыя сувязі з прыязнымі еўрапейскімі арганізацыямі.
Буду ўдзячны ўсім сябрам БНП за парады і дапамогу ў дасягненні нашых супольных мэтаў. Хачу выказаць пашану і падзяку маім папярэднікам. Упэўнены, што той падмурак, які яны зрабілі будзе надзейным апірышчам для маёй працы і дапаможа захоўваць і развіваць добрыя традыцыі супольнай працы недзяржаўных арганізацыяў на карысць Беларусі. Я адкрыты да камунікацыі з усімі сябрамі арганізацыяў БНП. Знайсці мяне можна ва ўсіх папуляных інтэрнэт-мэсенджэрах і сацыяльных сетках”.
Аляксей Мінчонак нарадзіўся і вырас у Мінску. Вышэйшую адукацыю атрымаў у БДУ на факультэце філасофіі і сацыяльных навук. Больш за 15 год актыўна працаваў у сферы медыяў. Быў заснавальнікам музычнага парталу “Тузін Гітоў”, карэспандэнтам Радыё “Рацыя” і прадстаўніком у Беларусі незалежнага тэлеканалу “Белсат”. Мае шырокія стасункі ў сферы недзяржаўных арганізацыяў Беларусі.
Паводле npbelarus.info