Андрэй Саннікаў: Іосіф Шагал — прэч з Беларусі!

Экс-кандыдат у прэзідэнты на выбарах 2010 г. Андрэй Саннікаў зрэагаваў на заявы пасла Дзяржавы Ізраіль у Беларусь Іосіфа Шагала, які назваў беларускіх палітвязняў крымінальнікамі з пункта гледзішча законаў Беларусі, а таксама на сустрэчу прадстаўнікоў беларускай апазіцыі з паслом у пятніцу.



sannikau.jpg

Свой допіс А. Саннікаў пакінуў у сваім акаўнце ў фэйсбуку. «Пару дзён сачыў за навінамі адрывачна, быў заняты і інтэрнэт уключаў перыядычна і ненадоўга. Сёння паглядзеў навіны і злёгку збянтэжыўся.
Аказваецца, гнюсныя паводзіны незразумелай асобы па прозвішчы Шагал выклікаюць неадназначную рэакцыю.

Аказваецца, з нагоды хама можна дыскутаваць. Аказваецца, знаходзяцца ў апазіцыі індывіды, якія ходзяць на паклон да нягодніка і потым спрабуюць апраўдаць яго: «Спадар нарыгаў у рызніцы, але ён не гэта меў на ўвазе».


Падобна на тое, што мы перайшлі да наступнага этапу дэградацыі, калі гаворка ўжо ідзе не пра маральнасць, а пра тое, каб амаральнасць зацвердзіць у якасці дабрачыннасці.

Непаразуменню па прозвішчы Шагал не месца ў Беларусі. І чым хутчэй ён з'едзе з нашай краіны, тым лепш будзе і для нас, і для Ізраіля. Быў бы не дурань, сам бы гэта зразумеў. Бо тыя самыя палітвязні, якіх гэта непаразуменне спрабуе абразіць, вельмі хутка будуць вызначаць палітыку Беларусі ў дачыненні да Ізраіля.


Здзіўляюць і журналісты, якія чамусьці вырашылі нязграбна знайсці выхад з сітуацыі і паведамілі, што МЗС Ізраіля адмежавалася ад заяваў свайго амбасадара. МЗС Ізраіля не зрабіла нічога, каб выбачыцца перад беларусамі.

На сайце амбасады Ізраіля ў Польшчы з'явілася нейкая інфармацыя, падпісаная супрацоўнікам нізкага рангу, але тычылася яна Польшчы, а ніяк не Беларусі. Вось у дачыненні да Польшчы МЗС Ізраіля паспрабавала адмежавацца ад слоў непаразумення па прозвішчы Шагал. Польшчу можна паважаць, а навошта паважаць Беларусь, калі прадстаўнікі апазіцыі тут жа кінуліся ратаваць хама.


Адзін Анатоль Лябедзька зразумеў, наколькі ўсё гэта агідна.
Шагал абразіў беларусаў свядома і зрабіў гэта публічна другі раз.
Калі яго ў бліжэйшы час не прыбяруць з Беларусі, значыць яго хамства варта лічыць афіцыйнай пазіцыяй Ізраіля. Не думаю, што дзяржава можа падобным чынам ставіцца да Беларусі, зямля якой дала Ізраілю большасць яго вялікіх лідараў.

Ну а тым, хто жадае зрабіць з сябе «міратворцаў» хачу нагадаць простыя правілы не толькі дыпламатычнага пратаколу, але і агульначалавечых паводзін. Хадзіць да хама для таго, каб выпрасіць прабачэнні, да таго ж з падарункамі, гэта ісці да хама ў слугаванне.


Шагал — прэч з Беларусі!»

Андрэй Саннікаў, facebook.com