Арганізатар кармлення птушак у Берасці сустрэне Дзень Волі ў камеры
У Бярозе затрыманы актывіст АГП Аляксандр Кабанаў, яго абвінавачваюць у парушэнні артыкула 23.39 КаАП – удзел у не санкцыяванай масавай акцыі. Кабанаў перад затрыманнем паспеў распачаць стрым, у якім заявіў, што яго затрыманне звязанае з кармленнем птушак у Берасці на плошчы Леніна 18 сакавіка.
Актывіст Аляксандр Кабанаў лічыць, што карміць птушак на плошчы закон не забараняе, але напрыканцы лютага за запрашэнне карміць галубоў суд прысудзіў яму штраф 50 базавых велічыняў. Фота – Мілана Харытонава
Суд адбудзецца ў панядзелак у Бярозе.
«Кармленне галубоў» – адна з формаў пратэсту супраць пабудовы акумулятарнага заводу ў Берасці, якую прыдумалі Аляксандр Кабанаў і Сяргей Пятрухін.
Пятрухіна затрымалі ўчора, ён знаходзіцца ў ІЧУ ў Берасці. За якую акцыю затрыманы Пятрухін пакуль невядома: 18 сакавіка яго на плошчы не было.
Пратэсты супраць заводу «iPower», які будзе прадукаваць свінцова-кіслотныя акумулятарныя батарэі, пачаліся сёлета ў студзені. Мясцовыя жыхары непакояцца за сваё здароўе. Людзей якія выступаюць супраць акумулятарнага заводу выклікае міліцыя і папярэджвае, аб недапушчальнасці ўдзелу ў несанкцыянаваных акцыях.
belsat.eu